Միակ տեղը, որտեղ չկա կուսակցականություն, իշխանություն, ընդդիմություն (տեսանյութ)

Փետրվարի 18-ին նախագահական ընտրություններում պաշտոնական տվյալներով հաղթանակ տարավ Սերժ Սարգսյանը. նա վերընտրվեց։ Սերժ Սարգսյանի պաշտոնավարման նախորդ 5 տարիների ընթացքում ընդամենը մեկ երկիր՝ Շվեյցարիան է ճանաչել ցեղասպանությունը։

Լուրեր.com-ի հետ զրույցում ՀՀ արդարադատության նախարարի պաշտոնակատար Հրայր Թովմասյանը, պատասխանելով այն հարցին, թե ինչպես է ինքը գնահատում Սերժ Սարգսյանի կատարած աշխատանքը Ցեղասպանության ճանաչման հարցում՝ հաշվի առնելով ընդամենը մեկ երկրի ճանաչման փաստը, ասաց, որ ճանաչման հարցում միայն նախագահը չէ, որ անելիքներ ունի։

«Երբ դրան նախորդող ժամանակահատվածում հիմնական երկրները ճանաչում են Ցեղասպանությունը, դրանով չպետք է գնահատել, թե մեկ երկիր է ճանաչել, 10 երկիր է ճանաչել և այլն, որովհետև յուրաքանչյուր ճանաչող երկիր ունի իր շահերը, իր խնդիրները և միայն մեր արտաքին քաղաքականության խնդիրը չէ, որ մեկ երկիրն ավել ճանաչեր։ Անշուշտ, ցանկացած երկրի, գիտնականի ճանաչում, միջազգային կազմակերպության կողմից զեկույց այս հարցով, նպաստում է սրան։

Բայց Ցեղասպանության ճանաչման ուղղությամբ ավելի խորքային քայլերը, երևույթուները, որոնք այս պահին հանրության համար տեսանելի չեն, սա կատարվում է, մյուս կողմից՝ ճանաչման գործում միայն նախագահը չէ, որ անելիքներ ունի, յուրաքանչյուրն ունի մեր մշակութային կազմակերպությունները, սփյուռքի մեր կազմակերպությունները, ինչը կատարվում է»,-ասաց Հրայր Թովմասյանը՝ հավելելով, որ սա միակ տեղն է, որտեղ չկա կուսակցականություն, չկա իշխանություն, ընդդիմություն։ «Սա բոլորինս է, և այս հարցում առանձնացնել՝ ով ինչ է արել, կարծում եմ՝ ճիշտ չէ»,-ասաց Թովմասյանը։

Լուսանկարը՝ Լուրեր.com-ի