Սպիտակցի Հայկոն, «մուղամ» լսելով, ճեղքել է ջահերով երթի մասնակիցների հոծ բազմությունը (տեսանյութ)

Shamshyan.com-ի հետ է կապվել ընթերցողներից Հ. Ղուկասյանը, ով պատմել է երեկ՝ ապրիլի 23-ին, տեղի ունեցած արտառոց դեպքի մասին։

Ղուկասյանը հայտնում է, որ ապրիլի 23-ին՝ ժամը 20։30-ի սահմաններում, Կիևյան կամրջի սկզբնամասում ավտոմեքենայով հայտնվել մի տղամարդ (զարմանալին այն է եղել, որ այդ ժամանակահատվածում Կիևայն-Օրբելի խաչմերուկը փակ է եղել, տղամարդը կարողացել է շրջանցել ոստիկանական մեքենան)։

Ընթերցողը հայտնում է, որ դեպի Ծիծեռնակաբերդ կատարվող ջահերով երթի ժամանակ հայտնված տղամարդը, ով ինչպես պարզվել է հետագայում երգիչ Սպիտակցի Հայկոն է եղել, կարողացել է ճեղքել հոծ բազմությունը և հասել է երթի միջնամաս և սպիտակ գույնի BMW X6 մակնիշի մեքենայով արաբա-թուրքական «մուղամ» էր միացրել այն ընթացքում, երբ երթի մասնակիցները հայրենասիրական խրոխտ երգեր են կատարել։

Հ. Ղուկասյանը տեղեկացնում է, որ երբ երթի մասնակցիները փորձել են ընդհատել «հերոս»-ի երթը, վերջինս առանց վարանելու դիմել է ձայնային ազդանշանի օգնությանն ու փորձել է ճեղքել մարդկանց հոծ բազմությունը։ Երկաթյա սպիտակ նժույգով «ասպետ» Սպիտակցի Հայկոն, ինչպես ականատեսն է ասում, գտնվել է ոչ սթափ վիճակում։

Երթի մասնակիցներն ակնկալում են, որ երգիչը հրապարակայնորեն ներողություն կխնդրի, և կոչ են անում ոստիկանությանն օրենքի սահմաններում պատժել երգչին։

Հ. Ղուկասյանը կայքին է տրամադրել լուսանկար և սիրողական տեսախցիկով նկարահանած տեսանյութ, որը ներկայացնում ենք ձեր ուշադրությանը։

Shamshyan.com-ը պատրաստ է ներկայացնել նաև Սպիտակցի Հայկոյի տեսակետը այս միջադեպի կապակցությամբ։