«Ժողովուրդ». ԲՀԿ-ն մշտապես օգտվել է իշխանական բարիքներից

Ծիծեռնակաբերդի հուշահամալիրում ԲՀԿ առաջնորդ Գագիկ Ծառուկյանի և ոստիկանության աշխատակիցների միջև գրանցված երեկվա միջադեպը բավական ուշագրավ նրբերանգներ է բացահայտել՝ կապված ներկայումս ՀՀԿ-ԲՀԿ հարաբերությունների իրական վիճակի հետ: Ինքնին այն փաստը, որ ՀՀ ոստիկանության որևէ աշխատակից կարող է հանդգնել արգելել Գագիկ Ծառուկյանին կամ նրանից շատ ավելի փոքր կշիռ ունեցող որևէ այլ օլիգարխի անցնել այս կամ այն ճանապարհով, բնականաբար, որևէ մեկի մոտ կասկածի նշույլ չի թողնում, որ դա արվել է ամենավերևից իջեցված հրահանգով:

Առայժմ, իհարկե, այդ ցուցադրական և բավական էժանագին մեսիջը «պրոֆիլակտիկ» բնույթ էր կրում, և թերևս նպատակ ուներ ընդդիմադիր դաշտ տեղափոխվելու սպառնալիքներ հնչեցնող ուժի ղեկավարին սթափեցնել: Դատելով Ծառուկյանի՝ ոստիկանության աշխատակիցների հետ դրսևորած երեկվա զուսպ պահվածքից, նա դա շատ լավ գիտակցում է, և առայժմ միարժեք չի կարելի կանխատեսել, թե իշխանությունների կողմից առաջիկայում մեծացվող ճնշումների պարագայում ինչպիսին կլինի Ծառուկյանի հակազդեցությունը: Սակայն մյուս կողմից էլ, իշխանությունների նման վերաբերմունքը չպետք է որ անսպասելի լիներ Գագիկ Ծառուկյանի ու նրա թիմի համար:

Հանուն արդարության պետք է նշել, որ իր գործունեության գրեթե ողջ ընթացքում ԲՀԿ-ն մշտապես օգտվել է իշխանական բարիքներից, սակայն երբ եկել է դրա համար ժողովրդի առջև պատասխանատվություն կրելու պահը՝ որպես կանոն, լքել է նավը: Անգամ վերջին մեկ տարվա ընթացքում՝ «այլընտրանք» դառնալուց հետո, ԲՀԿ-ն էլի իներցիայով շարունակել է ընկալվել և օգտվել իշխանական բարիքներից, այդ թվում և՝ ՀՀ սպորտի և երիտասարդության նախարարի պորտֆելից (նախարարի պաշտոնակատար Ռոստոմյանի ԲՀԿ անդամությունը սառեցված է, բայց ինքնին հասկանալի է, որ դա զուտ ֆորմալ նշանակություն ունի), Գագիկ Ծառուկյանի գլխավորած ՀԱՕԿ նախագահի և ԱԱԽ անդամի պաշտոններից:

Ընդ որում, երբ երեկ Ծիծեռնակաբերդում ոստիկանը խոչընդոտել է Ծառուկյանի երթը պատգամավորական ճանապարհով, վերջինիս ուղեկիցները շտապել են հիշեցնել, որ նա ԱԱԽ անդամ է: Ասել է թե՝ երբ հարկ է օգտվել այդ պաշտոնի ընձեռած լիազորություններից, ԲՀԿ-ականները դա շատ լավ հիշում են, իսկ երբ գալիս է հարգելու այդ նույն պաշտոնով սահմանված պարտավորությունները, ԲՀԿ ղեկավարը մշտապես մոռանում է այդ մասին՝ մեկնելով տարատեսակ գործուղումների:

Հատկապես վերջին մեկուկես տարիներին ԲՀԿ ղեկավարը որևէ անգամ չի մասնակցել ԱԱԽ նիստերին, անգամ, երբ այն հրավիրված էր Սաֆարովի արտահանձնման առիթով: Էլ չասած ԱԱԽ անդամ Ծառուկյանի՝ Սերժ Սարգսյանի երդմնակալությանը չմասնակցելու փաստը: Վստահաբար՝ հատկապես այս վերջինը ոչ մի կերպ չի ներվում նրան, և եթե Ծառուկյանի այդ քայլն իրոք քաղաքական հստակ դիրքորոշման արտահայտություն էր, ապա նա վերջնականապես պետք է հրաժարվի այս իշխանությունների ընձեռած ցանկացած պաշտոնական կարգավիճակից:

Մանրամասները՝ «Ժողովուրդ»-ի այսօրվա համարում: