Րաֆֆի Հովհաննիսյանին դահլիճ չեն տալիս

Այս օրերին Րաֆֆի Հովհաննիսյանը նորից շրջում է մարզերում՝ նոր Հայաստանի կազմկոմիտեներ ստեղծելու համար քննարկումների շարք կազմակերպում: Ինչպես նա հայտարարել էր «Անի պլազա» հյուրանոցում վերջին հավաքի ժամանակ, մարզային հանդիպումները նպատակահարմար է անցկացնել ոչ թե փողոցներում՝ հանրահավաքի տեսքով, այլ դահլիճներում, որովհետև պետք է լինի քննարկում, հարցուպատասխան, ինչը փողոցում անելը հարմար չէ:

Սակայն տարբեր մարզերում Րաֆֆի Հովհաննիսյանին ուղղակի որևէ դահլիճ չեն տրամադրում: Ավելին՝ զգուշացվում է մեծ տարածք ունեցողներին, որ խնդիրներ կունենան, եթե նրա առաջ դռները բացեն: Դահլիճ տրամադրելու հարցում խնդիրներ են աոաջացել Մարտունիում, Գավառում, Նոր Հաճընում, Աբովյանում, Իջևանում, Թալինում՝ այս կամ այն պատճառաբանությամբ:

Օրինակ՝ Թալինում Րաֆֆի Հովհաննիսյանի թիմի անդամները կարճատև ժամանակով մեկ դահլիճ տրամադրելու հարցով երկու անգամ հանդիպել են փոխքաղաքապետի հետ, բայց քաղաքապետը, հաշվի չառնելով, որ արդեն Րաֆֆի Հովհաննիսյանը Թալին է հասել, մերժել է նրան, պատճառաբանելով, թե ժամանակին չի դիմել, որ իրեն ներկայացրել է Արմեն Մարտիրոսյանը, ով պատգամավոր չէ:

Հովսեփ Խուրշուդյանը «Առավոտ»-ին փոխանցել է, որ այդ պահին տեղում, բացի Արմեն Մարտիրոսյանից, եղել են նաև իրենց պատգամավորները, այնպես որ, քաղաքապետի պատճառաբանությունը տեղին չի եղել: Թերթը նշում է, որ այն համախոհ քաղաքացիներն էլ, որոնք, այնուամենայնիվ, իրենց դռները բացել են Րաֆֆի Հովհաննիսյանի քննարկումը կազմակերպելու համար, խնդիրների առաջ են կանգնել: Նրանք ստացել են սպառնալիքներ և զգուշացումներ: