Տիգրան Սարգսյան. Ինչո՞ւ շտեմարանները հասանելի չեն

Այսօր կառավարության նիստի ժամանակ վարչապետ Տիգրան Սարգսյանն անդրադարձավ այն հարցին, թե ինչու դասագրքերն օնլայն տարբերակով հասանելի չեն:

«Մենք հիմա ուզում ենք դպրոցներն ամբողջությամբ անցկացնել համակարգիչների վրա. դա նշանակում է, որ երեխաները կարող են դասագրքերից օգտվել համակարգիչներով, բայց պարզվում է, որ դասագրքերը էլեկտրոնային եղանակով հասանելի չեն»-ասաց Տիգրան Սարգսյանը:

ՀՀ կրթության և գիտության նախարարի պաշտոնակատար Արմեն Աշոտյանի տեղակալ Կարինե Հարությունյանը նշեց, որ իրականում գրքերը հասանելի են էլեկտրոնային տարբերակով:

«Պարո՛ն վարչապետ, երևի տեղեկացված չեն դիմողները, այսօր նախարարությունն ունի կրթական պորտալ, որում բոլոր դասագրքերի էլեկտրոնային տարբերակները դրված են: Երևի ինտերնետ հասանելիության խնդիր է, չեն կարողանում օգտվել»,-ասաց Հարությունյանը:

Վարչապետի երկրորդ հարցը` ուղղված Կարինե Հարությունյանին, վերաբերում էր ընդունելության քննությունների համար նախատեսված շտեմարաններին:

«Ընդունելության քննություններն իրականացվում են շտեմարանների միջոցով, այդ շտեմարաններն ինչո՞ւ այսօր հասանելի չեն մեր քաղաքացիներին»,-հարցրեց վարչապետը:

Կարինե Հարությունյանը խոր հոքոցից հետո հայտնեց, որ ինքն այդ պահին դժվարանում է հարցին պատասխանել:

«Անցյալ տարվա բոլոր շտեմարանները հրատարակված են եղել ժամանակին և բաժանվել են, վաճառքի են հանվել, այս տարվանը դեռ չգիտեմ՝ հրատարակված է, թե՝ ոչ, դրանով զբաղվում է գնահատման և թեստավորման կենտրոնը»,-ասաց Հարությունյանը:

Տիգրան Սարգսյանը նշեց, որ այդ շտեմարանները պետք է անվճար հասանելի լինեն քաղաքացիներին, որովհետև պետական քննություններն անց են կացվում հենց այդ շտեմարանների հիման վրա»: