ՎՏԲ-Հայաստան բանկը հերքում է իր սնանկացման մասին լուրերը

ՎՏԲ-Հայաստան Բանկը հերքում և չի հաստատում «Ժողովուրդ» օրաթերթում հրապարակված հոդվածի հավաստիությունը: 

19.04.13 թ. ՎՏԲ-Հայաստան Բանկի Գովազդի և հասարակայնության հետ կապերի բաժինը «Ժողովուրդ» օրաթերթի լրագրողից ստացել է մի քանի հարց հետևյալ խմբագրությամբ՝

«Խնդրում եմ պատասխանել հետևյալ հարցերին.

Վերջերս հրապակային ծանուցմամբ ՎՏԲ-Հայաստան բանկն իր մասնաճյուղերից մեկը, որը գտնվում էր Տաշիրի տարածաշրջանում, լուծարեց: Ի ՞նչն է եղել լուծարման պատճառը: Բանկային ճգնաժա՞մը, թե՞ այլ պատճառներ կան:

Այս պահին ՎՏԲ-Հայաստան բանկը ՀՀ-ի տարածքում քանի՞ մասնաճյուղ ունի: Եւ անցյալ տարի դրանց թիվը քանի՞սն է եղել:»

25.04.13թ. Ժողովուրդ օրաթերթի լրագրողը Բանկի կողմից ստացված պատասխանը հրապարակել է Ժողովուրդ օրաթերթում N72 (528) և մի շարք տեղեկատվական կայքերում աղավաղված տեսքով, ինչը ընթերցողներին մոլորեցնում է:

Սույն մամլո հաղորդագրության շրջանակներում հրապարակվում է ՎՏԲ-Հայաստան Բանկի պատասխանը Ժողովուրդ օրաթերթի լրագրողի կողմից ներկայացված վերոնշյալ հարցերին առանց փոփոխության և կրճատման՝

«Տեղեկացնում ենք, որ ս.թ. ապրիլի 15-ից ՎՏԲ - Հայաստան Բանկ ՓԲԸ Տաշիր մասնաճյուղը չի լուծարվել, այլ դադարեցրել է գործունեությունը: Մասնաճյուղի ակտիվներն ու պարտավորությունները տեղափոխվել են ՎՏԲ-Հայաստան Բանկ ՓԲԸ Ստեփանավան մասնաճյուղ, ինչն ապահովում է Տաշիր մասնաճյուղի հաճախորդների բանկային ներդրումների ապահովվածությունը և հետագա սպասարկման հնարավորությունը:

Ինչպես գիտեք, բանկի ներկայիս քաղաքականությունը միտված է սպասարկման կետերի արդիականացման և հաճախորդների սպասարկման հարմարավետության բարելավմանը, ուստի տվյալ նպատակին համապատասխան մասնաճյուղային պայմաններ ապահովելը ենթադրում է հավելյալ ներդրումներ, ինչը ֆինանսական տեսանկյունից արդարացված չէր, այն դեպքում, երբ բանկն ընձեռում է սպասարկման շարունակականությունը ապահովող միջոցներ, մասնավորապես, ՎՏԲ - Հայաստան Բանկ ՓԲԸ շարունակում է ապահովել իր ներկայությունը տվյալ քաղաքի հարևանությամբ գտնվող Ստեփանավան քաղաքում, մասնաճյուղի հաճախորդները շարունակում են ունենալ հնարավորություն բանկի կողմից տեղադրված էլեկտրոնային սպասարկման սարքավորումների միջոցներով իրականացնել կանխիկ գումարի ելքագրումները բանկային հաշիվներից, իրականացնել վճարումներ: Առաջարկվում է նաև առանց բանկ այցելելու արագ փոխանցման համակարգերով վճարումների ստացում հաճախորդի անունով բացված բանկային հաշվին, առկա է Ինտերնետ բանկ ծառայությունը: Կենսաթոշակառուների սպասարկումը իրականացվում է անկանխիկ եղանակով բանկային հաշիվներին մուտքագրելու միջոցով: Հարկ ենք համարում նաև նշել, որ մինչև այս ամսվա վերջ Տաշիր քաղաքում կտեղադրվի բանկոմատ:

Այս պահին ՎՏԲ-Հայաստան Բանկ ՓԲԸ ՀՀ տարածքում ունի գործող 67 մասնաճյուղ, որից 43-ը մարզերում, իսկ 24-ը՝ ք. Երևանում: Անցյալ տարի նույն ժամանակահատվածի դրությամբ մասնաճյուղերի քանակը եղել է 70:

Հարգանքով՝

ՎՏԲ-Հայաստան Բանկ ՓԲԸ»