Համագործակցային ծրագիր՝ կենսաբանական պաթոգենների հայտնաբերման և չեզոքացման համար

ՀՀ գյուղատնտեսության նախարարի պաշտոնակատար Սերգո Կարապետյանն այսօր ընդունեց ԱՄՆ Պաշտպանության դեպարտամենտի պաշտպանական վտանգների նվազեցման գործակալության վտանգների համատեղ նվազեցման ծրագրի պատվիրակությանը՝ ծրագրի տնօրեն տիկին Էլիզաբեթ Ջորջի գլխավորությամբ:

Պատվիրակությունը Երևանում է ԱՄՆ-ի Պաշտպանության դեպարտամենտի վտանգների նվազեցման գործակալության նախաձեռնությամբ և ՀՀ կառավարության համագործակցությամբ Զանգվածային ոչնչացման զենքի տարածմանը հակազդելու համաձայնագրի շրջանակներում Հայաստանում կենսաբանական ոլորտում իրականացվող համագործակցային ծրագրի առաջին փուլի ավարտի և երկրորդ փուլի աշխատանքներն սկսելու կապակցությամբ:

Կարևորելով ծրագրի նշանակությունը Հայաստանում վտանգավոր կենսաբանական պաթոգենների հայտնաբերման ու չեզոքացման ուղղությամբ' Սերգո Կարապետյանը շնորհակալություն հայտնեց ԱՄՆ կառավարությանը Հայաստանում մարդկանց և կենդանիների հիվանդությունների կանխարգելման և վերացման ուղղությամբ իրականացվող աշխատանքներին օժանդակելու համար: Նա հատուկ անդրադարձավ Հայաստանում խոզերի աֆրիկյան ժանտախտի դեմ պայքարի ծրագրին, որի անհրաժեշտությունը տարածաշրջանային մյուս երկրների համար նույնպես անգնահատելի է:

Առանձնակի շեշտվեցին ծրագրի այն բաղադրիչները, որոնցով նախատեսվում է ստեղծել հետազոտական ժամանակակից լաբորատոր կենտրոն՝ իր մարզային մասնաճյուղերով, ինչպես նաև տեղական մասնագետների վերապատրաստման դասընթացների կազմակերպումը:

Տիկին Էլիզաբեթ Ջորջը, շնորհակալություն հայտնելով ընդունելության համար, հակիրճ ներկայացրեց այցի ընթացքում կայացած հանդիպումների արդյունքները և գոհունակությամբ նշեց, որ արդեն տեսանելի է որոշակի առաջընթաց ծրագրի իրականացման գործում: Նա հատկապես դրական գնահատեց մասնագետների վերապատրաստման կազմակերպման գործում ՀՀ գյուղատնտեսության նախարարության աջակցությունը:

Կողմերը ևս մեկ անգամ վերահաստատեցին այս կարևոր ծրագրի իրականացման գործին ըստ ամենայնի աջակցելու իրենց պատրաստակամությունը: