Mediamall.am կայքի մասին անհիմն լուրեր տարածողները չներկայացան բաց քննարկմանը (տեսանյութ)

Այսօր Mediamall.am կայքի խմբագրակազմը բաց քննարկում էր հրավիրել վերջին օրերին համացանցում և որոշ լրատվամիջոցներում շրջանառվող այն լուրերի վերաբերյալ, որ իբրև թե Mediamall.am կայքի ծրագրային էջում տեղադրված են եղել ինչ-որ կոդեր, որոնցով Mediamall.am կայքը մտնող օգտատերերից LIKE-եր են գնացել «Ավելի լավ Երևան» ֆեյսբուքյան էջին:

«Mediamall.am կայքի մասին անհիմն լուրեր տարածողներից ոչ ոք չուզեց գալ և ներկա լինել ասուլիսին, չնայած որ բոլորին տեղեկացված էր, ոմանց նույնիսկ հրավիրել էի առերես հանդիպման, սակայն հանդիպում նույնպես չկայացավ»,- լրագրողների հետ հանդիպման ժամանակ ասաց Mediamall.am կայքի գլխավոր խմբագիր Կարեն Վարդանյանը:

Քննարկմանը մասնակցելու էր եկել նաև Mediamall.am կայքի տեխնիկական սպասարկումն իրականացնող «Sargsyan Studio» ընկերության ղեկավար Սուրեն Սարգսյանը, որպեսզի պատասխանի կայքի հանդեպ նման բնույթի մեղադրանքներ ներկայացնողների հարցերին։

Նշենք, որ ֆեյսբուքյան բազմաթիվ օգտատերեր հայտարարել էին, թե հիմնավոր փաստեր ունեն։

Mediamall.am կայքի խմբագրակազմը կոչ է անում նման ինֆորմացիա տարածողներին, լրատվամիջոցներին՝ միայն բազմակողմանի ուսումնասիրություններից հետո այն հանրայնացնել, քանի որ այդ կերպ վարկաբեկվում է կայքի բարի համբավը։ Այն, որ հիմնավոր փաստարկներ չկային, և տարածված տեսանյութերը հեռու էին ճշմարտությունն արտացոլող իրականությունից և կեղծիքի հիման վրա էին կառուցվել՝ օգտագործելով որոշ հնարքներ, կարելի է ենթադրել այդ մասին տարածողների բացակայությունը այսօրվա քննարկումից։ Միայն մնում է եզրակացնել, որ արված հայտարարությունները կրում էին զուտ վարկաբեկման նպատակ, հակառակ դեպքում՝ այդ մարդիկ կմասնակցեին քննարկմանը և կստանային իրենց հուզող հարցերի պատասխանները։

Mediamall.am կայքի խմբագրակազմը մեծահոգաբար դեռևս հորդորում է քննարկումները կոռեկտության սահմաններում կազմակերպել, գործընկեր լրատվամիջոցներին կոչ է անում չցուցաբերել անբարեխիղճ մոտեցում՝ ի շահ օգտագործելով ինչ-ինչ նպատակների համար։

Նշենք, որ կայքի ծրագրային սպասարկումն իրականացնող «Sargsyan Studio» ընկերության ղեկավար Սուրեն Սարգսյանը ամենայն պատասխանատվությամբ հայտարարել է, որ «Mediamall.am-ում այդպիսի կոդ, որը, չգիտես ինչու, անգրագիտորեն անվանվում էր սկրիպտ, երբեք տեղադրված չի եղել: Բազմակողմանի ստուգումներ են իրականացվել, և արդյունքները ցույց են տվել, որ նման կոդ երբևէ չի էլ տեղադրվել: