Զվարթնոցը կքանդե՞ն. ահազանգ

Հրապարակախոս Զարուհի Հովհաննիսյանը Lurer.com-ի թղթակցի հետ զրույցում ասաց, որ ինքը տեղեկացել է Զվարթնոց օդանավակայանի շենքի քանդման մասին:

«Երկրի դեմքը ներկայացնող կառույցներից մեկն է, խորհրդային ժամանակահատվածում կառուցված մոդեռնիստական ճարտարապետության լավագույն նմուշներից մեկն է: Ես կարծում եմ, որ նմանատիպ միտք անգամ որևէ մեկի մոտ ծագել չէր կարող, բայց փաստորեն այն կա:

Ես դեռևս ուզում եմ փակ ինֆորմացիան բացել, այն դեռևս հանրային հնչեղություն չի ստացել, որպեսզի ճարտարապետությամբ հետաքրքրվող մարդիկ, մշակութային հուշարձանների պահպանությամբ զբաղվողները, և պարզապես այդ կառույցով հետաքրքրվողներն ուշադրություն սևեռեն առկա խնդրին և հետամուտ լինեն: Կառավարության պատասխան դեռևս չկա, բայց նմանատիպ առաջարկ եղել է, նման առաջարկ, եթե եղել է ուրեմն կստանա քննարկման հետագիծ: Հարկավոր է, որ հանրային հնչեղություն ստանա, և հանրությունն էլ մասնակցի այդ քննարկումներին»,- կարծում է Զարուհի Հովհաննիսյանը:

Հրապարակախոսի կարծիքով պետք է թույլ չտրվի քանդել այդ կառույցը, քանի որ մենք ունեցել ենք այդպիսի նախադեպ՝ երիտասարադական պալատի հետ կապված. մի քանի տարի է այդ տեղում ոչինչ էլ չկա, բայց այդ ընթացքում բարձրագոչ հայտարարություններ էին արվում:

«Եթե ինչ-որ մի բան չի համապատասխանում ժամանակակից չափանիշներին, կարելի է չէ՞ վերանորոգել, ինչո՞ւ անպայման քանդել, նույնը կատարվեց Երիտասարդական պալատի հետ: Եթե անգամ Էռնեկյանին չի բավարարում Զվարթնոցի նախնական վիճակը, թող բարի լինեն համակերպվեն, քանի որ այդ կառույցը Երևանը ներկայացնող կարևորագույն մոդեռնիստական ճարտարապետության նմուշներից մեկն է»,- ասաց խնդրով մտահոգ հրապարակախոսը: