Ոստիկանները գաղտնի հսկում են նաև Գյումրու դեղատները

Գյումրու կրիմինալ դեպքերից հետո այս քաղաքի բոլոր թաղամասերում արտակարգ ռեժիմով հսկողություն է իրականացվում մայրաքաղաքից ժամանած հատուկ նշանակության ջոկատայինների, ոստիկանության պարեկապահակային ծառայության կողմից: aravot.am-ի փոխանցմամբ՝ ոստիկանները ոչ միայն հատ-հատ կանգնեցնում ու ստուգում են Գյումրու փողոցներով երթևեկող գրեթե բոլոր ավտոմեքենաները, այլ խմբով՝ մոտ 6-7 հոգով, մտնում են դեղատները, այստեղից առևտուր անելու պատրվակի տակ ծածուկ ստուգում թե՛վաճառքի հանված դեղերը և թե՛ դեղատների հաճախորդներին:

Այսօր նման դեպքի է ականատես եղել կայքի լրագրողը Գյումրու Անի թաղամասի Պարույր Սևակի փողոցում գտնվող դեղատներից մեկում, որտեղ ժամը 14.30-ի սահմաններում նույն ոստիկանական խումբը արդեն 3-րդ անգամ էր այցելում: Վերջիններս այս մի անգամ ժգուտ էին ուզում վաճառողուհուց: Ի դեպ, դեղատների աշխատակիցները ի սրտե դժգոհում էին՝ այդպես էլ չհասկանալով նրանց ելումուտ անելու իմաստը: Հիշեցնենք, որ Գյումրիում թմրանյութերից մեծ տարածում ունի բենզինը, որը խառնելով դեղատներում՝ այժմ արդեն դեղատոմսով վաճառվող, սակայն գնային առումով խիստ մատչելի սեդալգինի հետ, տնային պայմաններում թմրանյութ են ստանում ու սրսկվում: Ինչպես ոստիկանի օրվա կապակցությամբ լրագրողի հետ զրույցում փաստեց Շիրակի մարզի ոստիկանապետ Կարեն Բաբակեխյանը, բենզինով թմրանյութի օգտագործումը մեծ տարածում ունի հատկապես գյումրեցի երիտասարդների շրջանակում:

Գյումրեցիների լեզվով ասած, նրանք բենզոլոգներ են, ովքեր թմրանյութի այս տեսակն են օգտագործում սոցիալապես անապահով լինելու պատճառով, ու նրանց մոտ սկսվում է փտախտ՝ հատկապես ծնոտի շրջանում: Ինչևէ, հատուկ ջոկատայինները, այդ թվում նաև ոստիկանության «Աղավնի» ջոկատը, կատարելով ՀՀ ոստիկանապետ Վլադիմիր Գասպարյանի հրամանը՝ փորձում են պարզել ու բռնել թմրամոլներին:

Ճանապարհային ոստիկաններն էլ ավտոմեքենաները կանգնեցնում են այն պարզ պատճառով, որ տարիներ շարունակ գյումրեցի հեղինակությունները, զենքն ու թմրանյութ դրած մեքենաների մեջ, ազատ ման են գալիս: Անձեռնմխելիությունը այս քաղաքում այն աստիճանի է հասել, որ մեքենայում զենք ու թմրանյութ պահելը հեղինակության հարց է համարվում: Նշենք, որ, ըստ ոստիկանների, հատուկ ջոկատայիններում ուժեղ պարապած տղաներ են ընդգրկված, հզոր, ֆիզիկապես առողջ, բոյով-թափով, ոչնչից չվախեցող: Նրանք համեմատաբար ավելի բարձր են վճարվում, քան շարքային ոստիկանները, եթե օրինակ՝ հասարակ սպայի աշխատավարձը 110-120 հազար դրամ է, ապա «Աղավնի» խմբի սպայինը 200 հազար դրամից ոչ պակաս: Ի դեպ, Երևանից ժամանած պարեկային ծառայության քրեական հետախուզության ներկայացուցիչներն էլ հետախուզում են Վարդան Ղուկասյանի ու ԱԺ պատգամավոր Մարտուն Գրիգորյանի շրջապատի, այդ թվում նաև ամենահեռավոր ազգականների տները: Քիչ առաջ նրանք հետախուզել են պատգամավորի հորը՝ Կամո Գրիգորյանի հորաքրոջ տղաների տները: