«ՓԵԹԱԿ» տոնավաճառի աշխատակիցների բաց նամակը՝ Սերժ Սարգսյանին

Ստորև ներկայացնում ենք «ՓԵԹԱԿ» տոնավաճառի աշխատակիցների բաց նամակը ուղղված Սերժ Սարգսյանին.

Մեծարգո պարոն նախագահ

Ետևում մնացին նախագահական ընտրությունները, և, իհարկե, մենք էլ բոլորի նման անցել ենք ամենօրյա մեր աշխատանքին: Ձեր նախընտրական ծրագրերում շատ լավ և խոստումնալից կարգախոսներ կային, և դրանց մեջ, իհարկե, «ապահով Հայաստան» կառուցելու Ձեր պատրաստակամությունը, սակայն խնդրում ենք պարզաբանել, թե ում համար եք Դուք պատրաստվում ապահով Հայաստան կառուցել - մե՞զ՝ սովորական աշխատավորների՞ս (այսինքն՝ ժողովրդի 99 տոկոսի համար), թե՞ մեր տնօրեն Վարուժան Գրիգորյանի նման մեծահարուստների- (այսինքն՝ ժողովրդի մեկ տոկոսի համար):

Բանը նրանում է, որ մենք՝ «Փեթակ» տոնավաճառի ավելի քան քառասուն աշխատակիցներս, մեր տնօրեն Վարուժան Գրիգորյանի հանձնարարությամբ եկել և միաձայն ընտրել ենք Ձեզ, սակայն նա, իր տված հին խոստումները դեռ չկատարած, հիմա էլ նորից ուզում է ոչխարի հոտի նման մեզ քշել քաղաքապետի ընտրություններին մասնակցելու և Տարոն Մարգարյանին ձայն տալու համար, մոռանալով, որ դեռ նախագահական ընտրություններից խոստացածները չի կատարել: Իհարկե, նրա այդ գործելաոճին վաղուց էինք ծանոթ, բայց չէինք սպասում որ այս անգամ էլ կխոստանա ու կխաբի:

Բանը նրանում է, որ մենք՝ գրեթե քառասուն մարդով՝ բեռնակիրներ, ավտոկանգառի հսկիչներ, հավաքարարներ, սանտեխնիկներ և այլ աշխատակիցներ, աշխատելով «Փեթակ»-ում, փաստացի գտնվում ենք ճորտի կարգավիճակում, և քանի դեռ մեր ղեկավարը Ձեր աշխատակիցն է, այդպես էլ մնալու ենք ճորտի կարգավիճակում՝ զրկված «ապահով ծերություն» ունենալու տարրական իրավունքից, քանի որ ոչ ոք չի համարձակվում խառնվել “Փեթակի” գործերին: Վիճակը կարող եք անձամբ Դուք շտկել և մեզ այդ վիճակից ազատագրելու քայլեր անել, քանի որ ինչպես նշեցինք, ուրիշ ոչ մեկը չի համարձակվելու նախագահի պալատում աշխատող պաշտոնյայի նկատմամբ գործողություններ անել:
Խնդիրը նրանում է, որ մեզնից ոչ մեկը որպես աշխատակից ձևակերպված չէ: Կան մարդիք, որոնք « Փեթակ »-ում աշխատում են հենց հիմնադրման օրից և առ այսօր որևիցե ձևով ձևակերպված չեն:

Երկար ժամանակ մենք ուրախանում էինք երբ Գրիգորյանն ասում էր «գնացեք արխային աշխատեք - ոչ հարկայինը, ոչ մաքսայինը ոչ էլ շեստոյը իրավունք չունեն մտնեն «Փեթակ» -ը ստուգեն», սակայն հետագայում հասկացանք, որ դա ոչ թե մեր օգտին է, այլ հսկայական վնաս է մեզ: Իրականում՝ որպես գործատու, մեր փոխարեն հարկերը պետք է վճարեր «Փեթակ»-ը և եթե մենք օրինական ձևակերպված լինեինք միևնույն է պետք է ստանայինք այն նույն չափի գումարը, ինչ որ ստացել ենք առանց ձևակերպված լինելու: Պարզապես այդ դեպքում մենք էլ կկարողանայինք մարդավայել թոշակի գնալ, կամ հիվանդության նպաստ ստանալ կամ ապառիկ եղանակով ապրանք ձեռք բերել խանութից, կամ բանկից վարկ վերցնել: Հիմա մենք այդ բոլորից զրկված ենք: Երբ ընթացքում այդ հարցով դիմողներ էին լինում Գրիգորյան Վարուժին, նրա պատասխանը հետևյալն էր. «Սա իմ սեփական հիմնարկն է, և ո՞վ չի ուզում, ո՞ւմ ձեռ չի տալիս թող ս… լինի ստեղից: Ինչ կարող էս ասել: Մարդը ձեռքն է գցել այս յուղոտ պատառը ու սեփականացրել, իսկ թոշակի գնացող աշխատակիցներին էլ ասում է. «դուրներդ չի գալիս ս… եղեք այստեղից»: Առավել համառներին , իսկապես ազատում էին աշխատանքից , իսկ մյուսներն էլ տեսնելով աշխատանքից ազատվածներին, այլևս չէին համարձակվում ձայն հանել: Վիճակը ավելի բարդացավ երբ Գրիգորյան Վարուժանը դարձավ Ձեր պալատի աշխատող: Հիմա «Փեթակ»-ի տնօրեն է նշանակել մի անկապ մարդու, (որը, իր ասելով անհրաժեշտության դեպքում պետք է իր փոխարեն բանտ նստի) և «Փեթակ»-ը շարունակվում է ղեկավարվել, ավելի անմարդկային և ճորտատիրական եղանակներով:

Այս նամակը Ձեզ ենք ուղղում լրատվամիջոցների միջոցով՝ բաց նամակի տեսքով և հաշվի առնելով որ մատնությունը « Փեթակ »-ում շատ հարգի երևույթ է, չենք կարող համաձայնվել, որ մեր անունները հայտնի դառնան մեզ նսեմացնողին, ուստի խնդրելու ենք լրատվամիջոցներին մեր անունները չհրապարակել նամակի տակ: Խնդրւմ ենք կարգադրեք որ նա մեզ սահմանված ձևով ձևակերպի որպես նորմալ աշխատակիցներ, դրանից բխող հետևանքներով և ոչ մեկին չազատի աշխատանքից այս նամակի պատճառով:
Հարգանքներով «Փեթակ» տոնավաճառի աշխատակիցներ: