Սուլեցին Կառավարությանը, գնացին նախագահական

Ինչպես Lurer.com-ը տեղեկացրել էր, այսօր բողոքի երթ էին անցկացնում «Նաիրիտ» գործարանի աշխատակիցները: Նրանք գործարանից շարժվեցին դեպի Կառավարության շենք՝ պահանջելով իրենց մեկ տարվա աշխատավարձերը:

Բողոքի մասնակիցների ներկայացուցիչ, գործարանի արհմիության ղեկավար Հրաչ Թադևոսյանը բանակցության նպատակով մտավ Կառավարության շենք: Շենքում նա զրուցել է էներգետիկայի և բնական պաշարների փոխնախարարի հետ: Բանակցությունների ավարտից հետո Թադևոսյանը տեղեկացրեց աշխատակիցներին, որ նախարարը խոստացել է վաղը 1 ամսվա աշխատավարձ վճարել, իսկ ևս մեկ ամսվա աշխատավարձ՝ մայիսի ընթացքում:

Սակայն այս հայտարարությունը միանշանակ չընդունվեց, բողոքի մասնակիցներն ասացին, որ իրենց նպատակը միայն 1 ամսվա աշխատավարձը չի եղել, և սկսեցին գոռալ և սուլել՝ արտահայտելով իրենց անհամաձայնությունը:

Դժգոհող աշխատակիցների մի մասը որոշեց շարժվել դեպի նախագահի նստավայր և իրենց պահանջները ներկայացնել հենց այնտեղ: