Վարչապետը տեսավ իր «քթի տակի» օրինախախտումը

Այսօր՝ ապրիլի 29-ին, Երևանի Ճանապարհային ոստիկանության տեսուչի կողմից վարչական պատասխանատվության է ենթարկվել «Mercedes S 500» մակնիշի 500 NN 50 համարանիշի ավտոմեքենայի վարորդը:

Ինչպես հայտնում է shamshyan.com-ը, վարորդն աշխատում է ՀՀ Կառավարության Իրավաբանական վարչությունում, իսկ նրա վարած ավտոմեքենայի դիմապակուց բացակայում էին ԱՊՊԱ և տեխզննման կտրոնները:

Ֆոտոլրագրողը հայտնում է, որ նշված ավտոմեքենան հաշվառված է Վանաձոր քաղաքի Տիգրան Մեծ փողոցում գրանցած «Վան 93» ՍՊԸ-ի հաշվեկշռում:

Գ. Շամշյանը հայտնում է նաև, որ նյութի հրապարակումից հետո Կառավարությունից նկատողություն են արել նրան, իսկ նա արդարացել է, թե իբր կտրոնները փակցված չեն եղել, քանի որ դիմապակին առավոտյան մգեցվել է:

Այս տեսակ սուտ՝ 7 բալանոց, միայն կառավարության անդամը կասեր:

Ինչպես ավելի վաղ հայտնել էր Գ. Շամշյանը, երբ Հայաստանում ընդունվեց ԱՊՊԱ-ի մասին օրենքը, վարչապետ Տիգրան Սարգսյանը Կառավարության նիստի ժամանակ ողջ կազմին հանձնարարեց, որ պարտադիր ավտոմեքենաների դիմապակուն ունենան ԱՊՊԱ և տեխզննման կտրոնները, իսկ այն անձիք, ովքեր չեն հարգի օրենքը, ապա հրաժեշտ կտան զբաղեցրած պաշտոնին:

Այսօր ֆոտոլրագրողը Կառավարության շենքի դիմաց լուսանկարների շարք էր արել, թե ինչպես էին «Mercedes S 500» մակնիշի 500 NN 50 համարանիշի ավտոմեքենայի դիմապակուց բացակայում ԱՊՊԱ և տեխզննման կտրոնները:

Ֆոտոլրագրողը հայտնել էր, որ նշված ավտոմեքենայի տերը աշխատում է Կառավարությունում և եթե վարչապետը տեսախցիկների առջև հորդորում է, որ պաշտոնյաները չխախտեն օրենքը, ապա հենց իր քթի տակ օրենքը խախտում էր իր աշխատակիցը:

Նյութի հրապարակումից հետո սպասվում էր, որ ճանապարհային ոստիկանությունը կառավարության օրինախախտ չինովնիկին վարչական պատասխանատվության կենթարկեր, ով էլ հետո կտրոնները կփակցներ ավտոմեքենայի դիմապակուն: