Անվանել «պրաստիտուտկա»՝ մնալ անպատիժ. սա է Սերժ Սարգսյանի ասած ապահով Հայաստանը

Թեեւ ՀՀ Սահմանադրության 14-րդ հոդվածում հստակ մատնանշված է, որ «մարդու արժանապատվությունը՝ որպես նրա իրավունքների ու ազատությունների անքակտելի հիմք, հարգվում եւ պաշտպանվում է պետության կողմից», այնուամենայնիվ, երեկ «Ժողովուրդ» օրաթերթը պարտվեց դատարանում: Դատավոր Նաիրա Ավետիսյանը վճռեց մերժել «Ժողովուրդ»-ի ներկայացրած հայցն ընդդեմ գործարար Խաչիկ Խաչատրյանի, որով պահանջում էինք Խաչիկից ներողություն խնդրել մեր լրագրողին վիրավորելու՝ «պրաստիտուտկա» անվանելու համար: Ասել է թե՝ լրագրողի արժանապատվությունը պետությունը չպաշտպանեց: Ավելին, դատավորը ոչ միայն իր վճռով արդարացրեց գործարարի խուլիգանական արարքը, այլեւ պարտադրեց «Ժողովուրդ»-ից բռնագանձել 100 հազար դրամ՝ Խաչիկի փաստաբանների համար (չհաշված 6.4 մլն դրամի պահանջը, որի քննությունը դեռ շարունակվում է): Ստացվում է, որ լրագրողների հետ փողատերերը կարող են վարվել այնպես, ինչպես պատահի, քանի որ դատարանները կանգնած են փողի իշխանության կողքին: Սա է Սերժ Սարգսյանի ասած ապահով Հայաստանը:

Հ.Գ. Վերը նկարագրվածից ենթադրվում է, որ այսուհետ ՀՀ ցանկացած քաղաքացի կարող է զանգահարել Խաչիկ Խաչատրյանին, դատավոր Նաիրա Ավետիսյանին, ՀՀ վճռաբեկ դատարանի նախագահ Արման Մկրտումյանին եւ նրանց անվանել «պրաստիտուտկա»՝ մնալով անպատիժ:

Մանրամասները՝ «Ժողովուրդ»-ի այսօրվա համարում: