Արմավիրի մարզի սահմանամերձ համայնքները չունեն տրանսպորտի միջոց

Ավելի քան մեկ շաբաթ է, ինչ Արմավիրի մարզի սահմանամերձ Բագարան եւ Երվանդաշատ համայնքները չունեն համապատասխան տրանսպորտի միջոց, որով կկարողանան գնալ Արմավիր քաղաք եւ վերադառնալ: Այս մասին «Ժողովուրդ»-ը տեղեկացավ նշված համայնքների բնակիչներից: Արմավիրի մարզպետ Աշոտ Ղահրամանյանից հետաքրքրվեցինք, թե այս ուղղությամբ ինչ քայլեր է ձեռնարկում: «Եթե ձեզ թվում է, որ դուք շատ եք շահագրգռված, ապա չարաչար սխալվում եք: Արդեն որերորդ ամիսն է՝ այդ գծատերը հրաժարվում է գիծը սպասարկելուց, որովհետեւ շահույթ չի ստանում: Հիմա էլ ասում է, որ էլ չի շարունակելու: Մենք էլ նոր մրցույթ կհայտարարենք: Եթե որեւէ մեկը կցանկանա, ապա կարող է մասնակցել մրցույթին»,-ասաց մարզպետը: «Ժողովուրդ»-ի հարցին, թե ինչու մինչ օրս չի հայտարարվել մրցույթը, նա վրդովված պատասխանեց. «Դիմե՛ք մարզպետարանի լրատվական ծառայություն, կպատասխանեն»,-ու անջատեց հեռախոսը: Ի դեպ, Ղահրամանյանը պարբերաբար այցելում է նշված համայնքներ՝ Արաքս գետում ձկնորսության:

Մանրամասները՝ «Ժողովուրդ»-ի այսօրվա համարում: