ԼՂ նախագահ Բակո Սահակյանի հարցազրույցը՝ ֆրանսիական AFP գործակալությանը

Լեռնային Ղարաբաղի նախագահ Բակո Սահակյանը Ֆրանսիայի մայրաքաղաք Փարիզ կատարած իր այցելության ընթացքում հարցազրույց է տվել Agence-France Press ֆրանսիական լրատվական գործակալությանը: Հարցազրույցի ընթացքում Սահակյանը հայտարարել է, որ Միջազգային հանրությունը պետք է դատապարտի Լեռնային Ղարաբաղը վերադարձնելու համար Ադրբեջանի կողմից հնչող սպառնալինքերը:

«Մենք մեր անհանգստությունն ենք հայտնում Ադրբեջանի վարած ռազմաշունչ քաղաքականության և նման տեմպերով սպառազինվելու նրա որոշումների կապակցությամբ, քանի որ վերջինիս կողմից մեր երկրի համար հստակ սպառնալիքի վտանգ կա: Միջազգային հանրությունը պետք է որևէ կերպ արձագանքի այդ իրավիճակին»,-հայտարարել է նախագահը:

Բակո Սահակյանը նաև նշել է, որ Ղարաբաղյան հակամարտության կարգավորման միակ ճանապարհը ինքը տեսնում է խաղաղ բանակցային գործընթացի միջոցով, սակայն հավելել է, որ Ղարաբաղը պետք է բանակցային գործընթացի անդամ դառնա: «Որպեսզի բանակցությունների ընթացքում իրական և լուրջ առաջընթաց ունենանք, պետք է փոփոխվեն այդ բանակցությունների ձևաչափերը, Լեռնային Ղարաբաղը պետք է ընգրկվի բանակցային գործընթացներին»,-ասել է նա:

«Ղարաբաղյան հակամարտությունը լուրջ կոնֆլիկտ է, որի լուծումը չի երևում մոտ ապագայում, սակայն այն կարգավորելու համար, բանակցություններից բացի, այլընտրանք պետք է չլինի»,-ասել է Սահակյանը:

Բակո Սահակյանն անդրադարձել է նաև Ստեփանակերտի օդանավակայանի գործարկման խնդրին՝ հույս հայտնելով, որ քաղաքացիական թռիչքները կկարողանան մեկնարկել արդեն այս տարի:

«Ստեփանակերտի օդանավակայանի գործարկումը չպետք է կապել հակամարտության հետ և քաղաքական ենթատեքստ հաղորդել դրան: Երևանի և Ստեփանակերտի միջև քաղաքացիական չվերթները պարզապես կօգնեն մեզ դուրս գալ այն իզոլացված վիճակից, որը մեզ պարտադրվել է»,-ասել է նախագահը: