Տարոն Մարգարյանը ծրարներ է բաժանում

Քիչ առաջ Տարոն Մարգարյանից ծրար ստացա: Մեջը՝ նամակ. Տարոնը ինձ նամակ էր գրել: Էպիստոլյար ժանրը մի այլ կարգի մոդա է ընկել: Դե, ինչ-որ տեղ նորմալ էր, զարմանալու բան չկար էլ, որ Տարոնը որոշել է հետս մտերմություն հաստատել, հեռվից միայն ինձ ճանաչելով (թեև մի ժամանակ ավագանու նիստերին իրար նորմալ բարևում էինք)՝ քայլ անել և հող նախապատրաստել ավելի անմիջական շփումների, բայց որ նույն Տարոնը կարող էր ճանաչել նաև ընտանիքիս անդամներին ու նամակի մեջ նաև նրանց անուն-ազգանունները առանց սխալի գրել՝ «Հարգելի այսինչ-այսինչյան», ահագին զարմացա:

Քարոզարշավի վերջին շաբաթը ՀՀԿ նախընտրական շտաբը որոշել է օգտագործել մաքսիմալ արդյունավետ: Առաջին օրը, դատելով ստացածս նամակից, որոշվել է տոտալ գրոհի ենթարկել ընտրողների հոգեկանի գիտակցական, ենթագիտակցական և անգիտակցական շերտերը՝ քաղաքապետից անձնական նամակներ ուղարկելով:

Էպիստոլյար ժանրը տարբեր տրամաչափի գործիչներ (օրինակ՝ Արմեն Աշոտյանը) պարբերաբար գործածում էին, բայց բավական էր նախագահ Սերժ Սարգսյանը մի անգամ նամակ գրեր, դա բարձրացավ մոդայի վերջին ճիչի մակարդակի: Եվ բնական էր, որ անգամ քարոզչության մեջ նորաձևության վերջին տենդենցներին հետևող և դրանցով շարժվող (ամենավառ վկայությունը՝ նորաձևության տների 2013-ի Գարուն-ամառ հավաքածուների մեջ մոդայիկ համարվող դեղին գույնին նախապատվություն տալը) Մարգարյանը կձգտեր այս հարցում էլ հետ չմնալ, հատկապես, որ թիմակից Գագիկ Բեգլարյանի գլխավորած Կապի ու տրանսպորտի նախարարության վերահսկողությամբ գործող Հայփոստի բաժանմունքները ձեռքի տակ էին և հրահանգի դեպքում կապահովեին անհրաժեշտ աշխատանքը:

«Կրկին դիմում եմ ձեզ, թեև ասելիքս փոխանցելու այս ձևն առաջին անգամ եմ կիրառում: Անկեղծ ասած, մարդու իմ տեսակը հակված չէ ճառերի ու միտինգային վարվեցողության. ինձ համար միշտ նախընտրելի է եղել սրտամոտ, մտերմիկ զրույցը մարդկանց հետ, նրանց խնդիրները հասկանալն ու հոգսը հոգալը: Ես կողմ եմ անմիջական շփումներին՝ անկախ քաղաքական անցողիկ հարաբերություններից: Պաշտոնյա և քաղաքացի շինծու տարանջատումը ինձ ավելի քան հասկանալի չէ»,-անկեղծացել էր ինձ հետ Տարոն Մարգարյանը:

Նույն ոգով՝ մեկ էջ, նամակի վերջում՝ քաղաքապետի անձնական ստորագրությունը՝ «Միշտ ձեր՝ Տարոն Մարգարյան» վերտառությամբ: Նամակի հակառակ երեսին կարդում եմ՝ «Պատվիրատու՝ ՀՀԿ: Տպաքանակը՝ 110 000 օրինակ»: Ինչպես տեսնում ենք, ՀՀԿ քարոզչությամբ զբաղվողներն այս անգամ ուղիղ նշանակետին են խփել՝ ընտրությունների վերաբերյալ ծանուցումների հետ միասին 110 000 ընտանիքի՝ իրենց իքս անդամներով, հրամցնելով սրտառուչ նամակներ: Իսկ այդ նույն ժամանակ որոշ ուժեր փորձում են «դռնեդուռ», «տնից տուն» քարոզչություն իրականացնել՝ օրվա մեջ հասցնելով ձեռքով բարևել կամ ծրագրեր բաժանել ամենաշատը մի հազար հոգու:

Ի դեպ, ծրարի ներսում միայն նամակ էր՝ փող, այլ կարգի ընտրակաշառք չկար: Բայց եթե հանկարծ ու վաղը դռան զանգը տան, բացեմ ու տեսնեմ էլի Տարոն Մարգարյանն է՝ այս անգամ ծաղկեփնջով ու արդեն էպիստոլյար ժանրը մի կողմ թողած՝ կենդանի շփման ծարավի, կարող է էլ չդիմանամ…

Լուսինե Կեսոյան