«Հաղթանակ» զբոսայգին և Կենդանաբանական այգին ազդարարում են հերթական տարեշրջանի բացումը

Մայիսի 1-ին Երևանի կենդանաբանական այգին ազդարարում է հերթական տարեշրջանի բացումը: Մուտքը երեխաների համար անվճար է: Այցելուներին բազմաթիվ հետաքրքիր անակնկալներ են սպասվում: Այգու տարբեր հատվածներում ժամը 11:00-ից կմեկնարկեն թատերական ու երաժշտական տարաբնույթ միջոցառումները:

Կիրականացվի բացօթյա տեղեկատվական ցուցադրություն, որի ընթացքում այցելուները հնարավորություն կունենան ոչ միայն մոտիկից տեսնելու կենդանիներին, այլև մասնակիցը կդառնան կենդանատեսակների կերակրմանը. իրենց հարցերը կուղղեն մասնագետներին, երեխաներն այգու տարբեր հատվածներում կմասնակցեն տարաբնույթ մրցույթների ու վիկտորինաների, որոնց մրցանակակիրները կստանան նվերներ:
Իսկ տարբեր ընկերությունների ու արտադրողների տաղավարների մոտ առանձին անակնկալներ են սպասվում:

Մայիսի 1-ին «Հաղթանակ» զբոսայգին նույնպես կազդարարի տարեշրջանի բացումը: Երևանի քաղաքապետարանն ու այգու տնօրինությունը հոգացել են, որ այդ օրն առավոտյան ժամը 10-ից 13-ը այգու մինչև 10 տարեկան այցելուները կարուսելներից ու ատրակցիոններից օգտվեն անվճար: Այգում կազմակերպված համերգային ծրագրերին ժամը 18-ից կմիանան հայկական էստրադայի ներկայացուցիչները իսկ տոնական օրվա ավարտին երկինքը կզարդարի գեղեցիկ հրավառությունը:

Բաց մի թողեք ձեր փոքրիկներին գունեղ, անակնկալներով լի տոնական օր պարգևելու առիթը:
Երևանյան մյուս այգիներում աշխատանքի օրվա կապակցությամբ ձեր զբոսանքին ուղեկից կլինեն փողային նվագախմբերի տոնական կատարումները: