Տարոն Մարգարյանը` մի օր, մի օր գըմփ

Չնայած նրան, որ այսօր Երևանում իշխանությունները զբաղված են պետական համակարգի մաքրման գործընթացով` ատմասկա կոչվածով, որը նպատակ ունի նաև հասարակության ուշադրությունը շեղելու գալիք ընտրությունների քաղաքական բնույթից` դարձնելով այն ապաքաղաքականացված` «ասֆալտային ու կակաչային» բնույթի։ Այսօր, ի հակադրում դրան, ոչ իշխանական ուժերը հստակորեն հակադրվում են իշխանության վարած այդ քաղաքականությանն ու լցնում հասարակական գիտակցության այն բացը, որն առաջացել էր փետրվարի 18-ից, և մանավանդ՝ ապրիլի 9-ից հետո:

Այն՝ հիասթափության, անվստահության ու ոչնչի չհասնելու վախի մթնոլորտը, որը ստեղծվել էր նախագահական ընտրություններից հետո, որին և միտված էին իշխանությունների բեմադրած թատերական ներկայացումները, այժմ կանգնած է փլուզվելու վտանգի առաջ, քանզի եթե ըստ ՀՀԿ-ի սցենարի՝ իրենց կողմից հմտորեն ստեղծված իրավիճակում քաղաքացիները, եթե պետք է լուրջ չմոտենային քաղաքապետի ընտրություններին կամ էլ նվազագույնը անճարությունից ապավինեին նրանց իսկ կողմից վերջին տարբերակով առաջարկված ընտրակաշառքին, ապա այսօր նույն այդ հակաիշխանական, բայց դեռևս իրեն ընդդիմադրի կեցվածք չհաղորդած սեգմենտը՝ ի դեմս ԲՀԿ-ի, ՀԱԿԿ-ի և ՀՅԴ-ի, փոխում են ու խառնում իշխանությունների խաղաքարտերը ընտրություններից օրեր առաջ, ինչն, իհարկե միանշանակ խուճապ է առաջացնում նույն Տարոն Մարգարյանի թիմում՝ այդպիսով փոխելով իշխանությունների կողմից հասարակության համար անհույս թվացող վիճակը:

Իհարկե, այս, եթե այդպես կարելի է ասել, եռադաշինքում առանցքային գործառույթներ իրականացնողն ու ընդանրապես ողնաշարային բնույթ կրողը հենց ԲՀԿ-ն է, և դրան որպես հիմք ծառայում են երկու կարևորագույն ֆակտորներ՝ առաջին հերթին, իհարկե, ֆինանսական անասելի մեծ ռեսուրսների առկայությունը, և երկրորդ՝ ԲՀԿ կուսակցության նախագահ Գագիկ Ծառուկյանի էտալոնային կերպարը, որն այսօր ԲՀԿ-ի համար կարևորագույն հենման կետն է:

Իսկ այս երկու գործոններից գոնե առաջինը՝ ֆինանսական ահռելի ռեսուրսները, ունեն Հայաստանում իրավիճակ փոխելու 100 տոկոս հնարավորություն, և դա, ինչպես և սպասվում էր, տվել է մեկնարկը այդ փոփոխության:

Մասնավորապես՝ այսօր ԲՀԿ-ն, մանավանդ՝ Գագիկ Ծառուկյանն ու հենց ԲՀԿ-ի ներսում գործարար գործիչների՝ իշխանությունների հետ հարաբերությունների վատթարացման վտանգով սպառնացող քայլերի սահմանափակումները տրամաբանորեն բերել են նրան, որ ԲՀԿ-ն, դառնալով առանցք, միաժամանակ իրականացնում է տարբեր տեսակի ֆունկցիաներ նաև ընդդեմ իշխանության, որն այս իրավիճակում չափազանց կարևոր է, և դա արվում է հենց այն դաշինքի մասնակիցների միջոցով, որոնք ներգրավված են այդ՝ ԲՀԿ կոչված առանցքի շուրջ:

Ըստ երևույթին, ԲՀԿ-ն, զբաղվելով սեփական քարոզարշավով միայն, զերծ մնալով իշխանություններին տրվելիք կոշտ գնահատականներից, իսկ ԲՀԿ ասելով՝ իհարկե, ի նկատի պետք է ունենալ Գագիկ Ծառուկյանին, թողնում է այդ պարտականությունները իր համակիրների ուսերին, ովքեր գերհաջող կատարում են իրենց պարտականությունները: Մասնավորապես՝ դրա մասին վկայող ամենաակնհայտ փաստը հենց ՀԱԿԿ-ի տարած քարոզարշավն է ընդդեմ Տարոն Մարգարյանի և միայն Տարոն Մարգարյանի:

Բացի այս, կա նաև մի կարևոր գործոն, որն աշխատում է իշխանության դեմ, խոսքը մասնավորապես վերաբերվում է ընտրական դաշտի ակտիվացմանը, այն նույն հասարակության գիտակցության բացի լրացմանը, որը խթան պետք է հանդիսանա ռեալ ընտրությունների համար: ԲՀԿ-ն նախ կաշառքի առումով ալտերնատիվ տարբերակ է ՀՀԿ-ի փոխարեն, իհարկե և որը կնախընտրի քաղաքացին, բացի այս, ԲՀԿ-ն, ֆինանսավորելով դաշտում շատերին, ավտոմատ կերպով նպաստեց այդ՝ քաղաքական ուժերի հասարակությունում ունեցած սեգմենտի ակտիվացմանը, որոնք հակառակ դեպքում ընտրություններին մոտենալու էին առանց մոտիվացիայի` ուղղակի, և վտանգը՝ որպես այդպիսին, ընտրություններին ընդանրապես չմասնակցելն էր, որը, սակայն, թույլ չտվեց ԲՀԿ-ն` այսպիսով զրկելով ՀՀԿ-ին քվեներ փախցնելու ավելորդ հնարավորությունից:

Սա միայն նախընտրական փուլում «մեքենայի» գործողությունների սցենարն է, իսկ ահա հենց ընտրության և դրան հաջորդող օրերին այս «մեքենան» արդեն լծված է լինելու վերահսկողական գործառույթներ իրականցնելու գործին՝ զրկելով ՀՀԿ-ին իր ամենակարևոր զենքերից մեկից՝ կեղծելուց:

ՀՀԿ-ի՝ գերկեղծելու ու նույն ՀՀԿ-ի կողմից Երևանը հինգմիլիոնանոց քաղաք չդարձնելու գործոնների բացակայությամբ հանդերձ, իհարկե, նման սցենարի դեպքում, և որի տեսքը կարծես արդեն իսկ ուրվագծվում է, ՀՀԿ-ն կարող է մնալ առանց շանսերի արդեն իսկ ընտրություններից մեկ կամ երկու օր առաջ՝ իր որդեգրած «ասֆալտային ու կակաչային», ասել է թե՝ կոսմետիկ վերանորոգման մեխանիզմներով հանդերձ՝ ենթադրելով Տարոն Մարգարյան ֆիգուրի իսպառ վերացումը քաղաքական դաշտից:

Գևորգ Ավետիսյան