Ջուսի և Կարեն Օհանյանի նոր տեսահոլովակը

Այսօր տեղի ունեցավ երգչուհի Ջուսի և 11-ամյա Կարեն Օհանյանի նոր զուգերգի պրեմիերան: Lurer.com-ի թղթակցի հետ զրույցում Ջուսը, խոսելով տեսահոլովակի մասին, ասաց, որ այն իր մնացյալ գործերից տարբերվում է իր դինամիկայով. տեսահոլովակի ողջ ընթացքում Ջուսն ու Կարենը և՛ պարում են, և՛ երգում: Տեսահոլովակը կոչվում է «Tonight»:

«Շեշտը դրված է կոնկրետ պարի վրա: Այն սյուժե չունի, ընդհանուր պարային տեսահոլովակ է: Ես այնտեղ ներկայանում են նոր կերպարների մեջ, նոր ոճով, ես դեռ չեմ երգել այդ ոճի մեջ, գնացի այդ քայլին, որովհետև շատ եմ սիրում նորություններ»,- ասաց երգչուհին:

Ջուսը նաև պատմեց իր և Կարեն Օհանյանի հանդիպման մասին. նկատել է Կարենին անցյալ տարվա մանկական Եվրատեսիլի նախընտրական փուլում և որոշել է անպայման տեսահոլովակ նկարահանել փոքրիկ երգչի հետ:  

11-ամյա երգիչ Կարեն Օհանյանն էլ մեզ հետ զրույցում, խոսելով այս տեսահոլովակի մասին, տեղեկացրեց, որ իր կյանքում ունեցած առաջին տեսահոլավակն է:

«Նկարահանումները կատարվել են երկու օրում, և այդ ընթացքում հասցրել են շատ զավեշտալի դեպքեր տեղի ունենալ: Պարային շարժման ընթացքում Ջուսի արհեստական մազերը իմ ձեռքում մնացին, սկզբից վախեցա, մտածեցի նրա իրական մազերն են, հետո տեսա Ջուսը ռեակցիա չի տալիս, ուրախացա որ իրեն չեմ վնասել: Մի դեպք էլ պատմեմ. պարի ընթացքում մի շարժում կա, երբ ես Ջուսի ոտքերի տակն եմ լինում, այդ ժամանակ Ջուսն իր բարձրակրունկներով ինձ տրորեց: Շատ ցավոտ էր»,- ծիծաղելով պատմեց Կարեն Օհանյանը:

Երաժշտության հեղինակը երիտասարդ երգիչ, երգահան Գուժն է: Ռեժիսորն Արմեն Փիրիմասիհինն է, խոսքերի հեղինակը՝ Նինա Ավագյանը, օպերատորը՝ Ռոբ Խաչիկյանը, դիմահարդարումը՝ Մերի Հարությունյանը, պարային թիմը՝ Fire Style Crew:

Առաջարկում ենք դիտել տեսահոլովակը.