Սա պետք է լինի քաղաքական ընտրություն, ոչ թե մենեջերի. Վահագն Խաչատրյան

Ազատության հրապարակում իր հանրահավաքն է շարունակում «Հայ ազգային կոնգրեսը»։ Ելույթով հանդես եկավ Երևանի ավագանու ընտրություններում ՀԱԿ ցուցակը գլխավորող Վահագն Խաչատրյանը։

«Այս ընտրություններն ավելի շատ քաղաքական են մեզ համար։ Իշխանությունը հակադարձեց՝ սա մենեջերի ընտրություն է։ Եթե դա պարզապես մենեջերի ընտրություն է, եկե՛ք, ուրեմն, սահմանափակվենք այդքանով։ Պետք է լինի քաղաքական ընտրություն, ոչ թե մենեջերի։

Երևանը դառնում է անհարմար, կեղտոտ, կանաչափատումից զուրկ քաղաք։ Նույն անտեր վիճակն է։ Քաղաքացին չի կարողանում փոխել ոչինչ և հեռանում է՝ չիմանալով անգամ՝ կվերադառնա հետ, թե՝ ոչ։ Կարող ենք վերադարձնել շատ բան, բայց հայրենակցին հետ վերադարձնել, ստիպել վերստին սիրել իր երկիրը, դժվար է։

Սա պետք է լինի քաղաքական ընտրություն և վերջին շանսը՝ վերցնելու իշխանությունը։ 

Մենք դադարեցնելու ենք Կենտրոն համայնքի կառուցապատման աշխատանքները, Երևանում այլևս ծառ չի կտրվելու, ծառերը համարակալվելու են։

Ճանապարհային երթևեկության կանոնները խախտելու համար սահմանված վճարները կրկնակի անգամ կնվազեցնենք, հակառակ դեպքում՝ արագության խախտումները արձանագրող բոլոր սարքերը կապամոնտաժվեն։

Գնահատելու ենք մարդկանց ըստ նրանց խելքի, մասնագիտական կարողությունների։

Մենք թափանցիկ ենք դարձնելու Երևանի բյուջեն, իջեցնելու ենք հարկային բեռը մանր ու միջին բիզնես ծավալողների համար։

Մենք մայիսին վերադարձնելու ենք իշխանությունը ժողովրդին»։