Աննա Ավետյան. Որտե՞ղ էիր մարդ Աստծո

Մյուսներին ոչ նման, բայց նաև ոչ «աննման» Աննա Ավետյանը մի օր կորավ: Մենք անգամ չզարմացանք, քանի որ այդպես էլ է պատահում: Ավելի ճիշտ՝ հիմնականում հենց այդպես էլ պատահում է: Բայց Աննան վերադարձավ ու հայտարարեց, որ այդպիսով լուրջ հայտ է ներկայացնում: Մենք դարձյալ չզարմացանք, պարզապես ցանկացանք հավատալ և պարզաբանել, թե ի՞նչ է սպասվում մեզ :)

- Հեռուստատեսային նախագծերից մեկին մասնակցելուց, եզրափակիչ հասնելուց ու մի քանի համերգներից հետո կորար: Ի՞նչն էր պատճառը:
- Թեև ենթադրվում էր, որ այդ շրջանում պետք է բազմաթիվ նորություններ ունենայի, այնուամենայնիվ, կարծում եմ՝ բոլորս էլ հասցրել ենք հասկանալ, որ կյանքում շատ կանոններ խախտվում են: Սա այդ դեպքն էր: Անկախ ոլորտից, երբ բռնածդ գործում ինչ-որ բաներ չեն ստացվում, ցանկություն է առաջանում ամեն ինչ «գրողի ծոցն» ուղարկել, այլ գործում ուժերդ փորձել, և գուցե հենց այդ նոր զբաղմունքն էլ քեզ համար նախատեսված լինի: Նման հոգեվիճակ ունեցա, բայց նաև շուտ անցավ, և ես կշարունակեմ երգել:
Ամեն ինչ ինձ մոտ միանգամից եկավ ու միանգամից էլ գնաց: Շփոթված էի, բայց փորձեցի այդ վիճակից դուրս գալ:
- Ինչպե՞ս հաղթահարեցիր այդ շրջանում առաջացած դժվարությունները:
- Անընդհատ երաժշտություն էի լսում:
- Իսկ ավելի գործնակա՞ն: Ի՞նչ քայլեր ձեռնարկեցիր:
- Ծանոթացա ներկայիս պրոդյուսերիս՝ Գուրգեն Պողոսյանի հետ: Մի անգամ Գուրգենն առաջարկեց գործնական թեմայի մասին զրուցել: Դրանից հետո մտերմացանք ու սկսեցինք համագործակցել: Այդ շրջանում սկսեցինք ծրագրել մեր առաջիկա համագործակցությունը, որոշ բանակցություններ վարել, բայց փաստացի ոչինչ չհասցրեցինք: Ամեն ինչի համար ժամանակ է պետք:
Այժմ զբաղված ենք նոր երգերի ձայնագրություններով և այլ աշխատանքներով: Կարելի է ասել՝ վերջ ենք դնում լռության շրջանին ու բուռն գործունեություն սկսում: Նախ ինձ «կհիշեն» ու նոր երգերս կլսեն ռադիոկայաններով, հետո արդեն ալբոմ ու տեսահոլովակ կունենամ:
- Գուրգենի հետ սիրավե՞պ ունեք:
- Ոչ, Գուրգենն ընտրյալ ունի: Բացի այդ, մենք այնքան մտերիմ ենք, որ այդ մասին չենք էլ մտածում: Կան մտերիմ մարդիկ, ում հետ սիրախաղի կամ սիրավեպի մասին մտածելը ծիծաղելի է դառնում:

- Իսկ դու ունե՞ս ընտրյալ:
- Չունեմ: Դեռ չեմ գտել:
- Տեղյակ ենք, որ որոշ ժամանակ արտասահմանում էիր: Որտե՞ղ էիր, ինչո՞վ էիր զբաղված:
- Ցանկացա ու գնացի: Սա տեղեկատվություն է, որը չեմ ցանկանում բացահայտել: Միայն մտերիմներս գիտեին, թե որտեղ եմ եղել: Դա գաղտնիք չէ… (Չկապակցված ու ձգված նախադասությունների արանքում Աննան անպատեհ ու շփոթված ժպտում էր, փախցնում հայացքը): Բացակայում էի որոշ անձնական խնդիրներով (Աննան խնդրեց հատուկ հստակեցնել, որ «անձնական խնդիրները» գլոբալ հասկացություն է, որին «հատուկ ինչ-որբաներ վերագրել» պետք չէ. եթե հասկացաք, թե նա ինչ նկատի ունի, շնորհավորում եմ), նաև արտերկրում լինելու, մարդկանց հետ շփվելու և երաժշտության հետ կապված որոշ գործերով: Մի խումբ կար, որի կազմում երգել եմ: Ես խմբի մենակատարն էի, և մենք միասին էինք աշխատում:
Թող չթվա, թե ինտրիգներ եմ ստեղծում, ուղղակի պահ է լինում, երբ ցանկանում ես մեկնել, հեռվում լինել (Աննան դեռ երկար շարունակեց թեմայի շուրջ պտտվել, բայց այդպես էլ հստակ ոչինչ չասաց):

Հ.Գ. Մենք, այնուամենայնիվ, փորձեցինք մեր հավաստի աղբյուրներից ճշտել Աննայի գտնվելու վայրը. Հայաստանի նման փոքր երկրում գաղտնիքներ պահելը նման է հոլիվուդյան ֆիլմերից ոգեշնչվելուն և ծիծաղելի իրավիճակում հայտնվելուն: Մեր աղբյուրները նշեցին, որ Աննան որոշ ժամանակ աշխատում ու բնակվում էր Լոնդունում: Նրա երկարատև ուղևորության մասին այլ մանրամասներ հայտնի չեն:

«Ե՞ս Yes!» ամսագիր, արխիվ