Ոստիկանության «հրեշտակները» «հասան» Գյումրի

Այս օրերին Գյումրիի փողոցներում կհանդիպես ոստիկանության «հրեշտակների ջոկատ» անունը կրող ոստիկաններին:

Գյումրեցիներն ապրիլի 30-ին ֆոտոլրագրող Գագիկ Շամշյանին պատմում էին, որ միայն նրանց փողոցում հայտնվելով՝ ավելի ապահովված ու պաշտպանված են զգում իրենց:

Գյումրեցիները հայտնում էին նաև, որ «հրեշտակներն» իրենց հագուստներին կրում են խորհրդանշական աղավնի ու վստահ էին, որ Գյումրիում կտիրի խաղաղությունը, այլ ոչ թե կրիմինալը, զոռբայությունն ու կլանների բախումը: Այս մասին հայտնում է shamshyan.com-ը:

Եթե «հրեշտակները» շարքային գյումրեցուն պաշտպանում են փողոցում, ապա ոստիկանության Շիրակի մարզային վարչության, Ոստիկանության Գյումրու բաժնի, Ոստիկանության քննչական գլխավոր վարչության Շիրակի մարզային վարչության աշխատակիցները՝ Քրեական հետախուզության օպեր-լիազորների, մարզային վարչության և Գյումրու բաժնի հետաքննիչների, տեղամասային տեսուչների և ճանապարհային ոստիկանության 2-րդ սպայական գումարտակի 2-րդ վաշտի 2-րդ դասակի աշխատողների հետ, շարունակում են բացատրական աշխատանքներ կատարել այն կասկածյալ քաղաքացիների հետ, որոնց մոտ կան ապօրինի զենք-զինամթերք:

Ֆոտոլրագրողը հայտնում է, որ այդ ամենի արդյունքում՝ արդեն մեծ թվով քաղաքացիներ իրենց մոտ եղած ապօրինի զենքերն ու զինամթերքները ներկայացնում են իրավապահ մարմիններին, որոնք էլ ազատվում են քրեական պատասխանատվությունից:

Իսկ այն անձինք, ովքեր «կամակոր այծի» պես հրաժարվում են ներկայացնել իրենց մոտ եղած ապօրինի զենքն ու զինամթերքը, դրա վերաբերյալ գյումրեցիներն ասում էին, որ «մեկա՝ գողի ու ...-ի օրը 40 օր ա»: