«Հայ ազգային կոնգրես» դաշինքի անդամ կուսակցություններն այսօր քաղխորհրդի նիստ են հրավիրել

Հայ ազգային կոնգրես դաշինքի անդամ կուսակցություններն այսօր քաղխորհրդի նիստ են հրավիրել, որին մասնակցելու են դաշինքը նորոգելու ծրագրեր մշակող 5 կուսակցությունների ներկայացուցիչները՝ «Ժողովրդավարական հայրենիքը», «Քրիստոնեաժողովրդավարական վերածնունդը», «Ժողովրդավարական ուղին», Հայաստանի կանաչների կուսակցությունը և «Մարդու իրավունքներ-96»-ը: Նիստը տեղի կունենա ԺՈՒԿ գրասենյակում, ժամը 13:00-ին:

Քաղխորհրդի մասնակիցները նախորդ նիստից հետո կոչ էին արել ՀԱԿ-ից հեռացած կամ վերջինի հետ հարաբերությունները սառեցրած կուսակցություններին՝ հետ վերադառնալ և պայքարել ՀԱԿ հայտարարած նպատակի՝ երկրում սահմանադրական կարգի հաստատման և ռեժիմի կազմաքանդման համար: Երեկ «Քրիստոնեաժողովրդավարական վերածնունդ»-ի ղեկավար Սոս Գիմիշյանը «Հրապարակ»-ի լրագրողին տեղեկացրել է, որ բանակցություններ են ընթանում Ստեփան Դեմիրճյանի, Արամ Սարգսյանի և այլոց հետ, ու բոլորը դրական են արձագանքել իրենց նախաձեռնությանը, թեև Արամ Սարգսյանը դեռ չի շտապում որոշում կայացնել:

Ստեփան Դեմիրճյանի կուսակցությունը, ըստ Գիմիշյանի, ևս չի պատրաստվում լքել ՀԱԿ-ը, իսկ թե քաղխորհրդի նիստերին ինչու չի մասնակցում, ասել է. «Երևի սպասում են, թե գործընթացներն ինչպես կընթանան, դա իմ կարծիքն է»: