Նարբե Պողոսյան. ''Մի բան պիտի կորցնես, որ մի բան գտնես''

ATV հեռուստաընկերությամբ հեռարձակվող «Ընտանեկան պատմություններ» հաղորդաշարն արդեն մի քանի տարի է, ինչ հասարակության ուշադրության կենտրոնում է: Այս հաղորդաշարի ընթացքում ներկայացված պատմությունները երբևէ պատահում են յուրաքանչյուրի ընտանիքում, սա է պատճառներից մեկը, որի համար հաղորդաշարը մեծ լսարան ունի, իսկ մյուսը' դրա ստեղծագործական թիմի, մասնավորապես' Նարբե Պողոսյանի ու Աստղիկ Ալավերդյանի պրոֆեսիոնալ աշխատանքն է:

ArmStar.am-ի հետ զրույցի ընթացքում Նարբեն պատմեց հաղորդաշարի ստեղծման, աշխատանքների կազմակերպման, և, որ ամենակարևորն է, իր ու Աստղիկի «գործնական» սիրո մասին: «Ընտանեկան պատմություններ հաղորդաշարը նախկինում հեռարձակվում էր «Կենտրոն» հեռուստաընկերությամբ, այն ժամանակին կոչվում էր «Տարբերակ»: Դա 2005 թվականին էր»: Նարբեն պատմեց, որ հաղորդաշարի առաջին թողարկումը «արկածներով» լի է եղել, այն հենց սկզբից բավական մեծ արձագանքներ է ստացել հասարակության կողմից:

«Հիշում եմ առաջին անգամ հաղորդումը սխալմամբ էր եթեր մտել, չպիտի այդ օրը հեռարձակվեր, և դրա հաջորդ առավոտյան հեռուստաընկերության աշխատողները բողոքում էին, որ գիշերը տասնմեկն անց կես, հաղորդման հեռարձակումից հետո հեռուստադիտողները սկսել են զանգել, կարծիք արտահայտել' տարբերակներից մեկին կամ մյուսին հավանություն տալով»:

ArmStar.am-ին հետաքրքրեց նաև, թե ի սկզբանե Աստղիկն ու Նարբեն գործընկերնե՞ր էին, թե՞ սիրեցյալներ: «Չորս տարի նույն ինստիտուտում սովորելով ես ոչ մի անգամ Աստղիկին չեմ տեսել: Նա դերասանական բաժնում էր' Մազմանյանի կուրսում: Երբ քասթինգ էի կազմակերպել «Տարբերակ»-ի համար, բոլոր դերասանուհիները գալիս էին, մասնակցում, բայց ոչ ոք ինձ դուր չէր գալիս: Հետո դերասանուհի Աննա Պանին, ով հիմա մեզ մոտ խաղում է, մեզ ծանոթացրեց: Երբ տեսա Աստղիկի խաղը, ինձ շատ դուր եկավ: Նա խաղում էր ճիշտ այնպես, ինչպես ես էի ուզում: Մենք սկսեցինք նկարահանումները: Մեր երրորդ հանդիպման ժամանակ նոր մեր մեջ ինչ-որ բան սկսվեց»,-մտաբերեց Նարբեն:

2010 թվականից սկսած Նարբեի հեղինակած «Տարբերակ» հաղորդումը վերսկսեց իր գործունեությունն արդեն ATV հեռուստաընկերությամբ, որտեղ էլ մինչ օրս շարունակում է իր գործունեությունը: Ըստ Նարբեի' հաղորդման սցենարական մասով իրենց շատ օգնում են հանսդիսատեսի արձագանքները, որտեղ մարդիկ պատմում են իրենց ընտանեկան պատմությունները: «Երբ մենք երկու տարի ժամկետով պայմանագիր էինք կնքում ATV հեռուստաընկերության հետ, մեզ մոտ այդքան թեմա գտնելու մտավախություն առաջացավ, բայց թեմաները իրենց իրենց ծնվում են, մի օր կարող է աշխատանքի գնալու ճանապարհին տաքսու վարորդը պատմություն պատմի, հետո հեռուստադիտողներն են մեզ շատ գրում»,-ավելացրեց Նարբեն,-«Մենք խնդիր ենք ունենում միայն այն ժամանակ, երբ հանդիսատեսը մեզ այնպիսի թեմաներ է առաջարկում, որոնք հեռուստատեսությամբ հեռարձակելն անհնարին է»:

Նարբեի ու Աստղիկի աշխատանքային փորձն ավելի երկար է, քան ամուսնականը, բայց մեզ հետաքրքրեց նաև, թե ըստ զույգի, ճի՞շտ է միասին աշխատելը, արդյոք անհրաժեշտ չէ իրարից հեռու լինել, թեկուզ միմյանց կարոտելու համար: «Հենց այս նպատակով ես ու Աստղը հիմա «հերթափոխով» ենք աշխատում: Վաղը Աստղիկը նկարվում է, ես չեմ նկարվում: Հենց նրա համար, որ աշխատանքն ու անձնականը չխառնենք, իրար կարոտենք, թեև օրվա ընթացքում այնքան ենք աշխատում, որ իրար հետ շփվելու ժամանակ էլ չի մնում»,-մեկնաբանեց Նարբեն:

Նարբեն պատմեց նաև, որ ընտանեկան պատմություններն իրենց օգնում են, որ դասեր քաղեն ու չկրկնեն այդ պատմությունների հերոսների սխալները: Ինչ վերաբերվում է տեսարանների ազատությանը, զույգի' միմյանց խանդելու հարցին, Նարբեն կարծում է, որ շատ լավ է, երբ ամուսինները միևնույն բնագավառից են: «Արվեստի ասպարեզի մարդկանց զույգը պիտի լինի նույն ասպարեզից, որ հասկանա, թե ինչ է նշանակում այն, որ կինը գիշերը տասներկուսն անց կես նկարահանման է, կամ գրկախառնվում է այլ տղամարդու հետ: Ամուսինը պիտի լինի նույն ասպարեզից, որ կնոջը չխանդի, իսկ ես ոչ միայն չեմ խանդում, այլև հարգում եմ, որովհետև այն, ինչ այսօր Աստղիկն անում է, ես երկար տարիներ եմ փնտրել»:

Թեև զույգը ներդաշնակ ու համերաշխ է ապրում, այնումենայնիվ իրենց կյանքում ևս եղել են «ճգնաժամային» պահեր: «Կար մի պահ, երբ ես ու Աստղիկը պիտի բաժանվեինք: Դա հորս մահից առաջ էր: Մենք շատ ծանրաբեռնված էինք աշխատում, արդեն բազմահազար սերիաներ էինք նկարել ու մի պահ եկավ, երբ ես շատ հոգնել էի, ու գործի մեծ մասը Աստղիկն էր անում: Մեր մեջ այդ շրջանում շատ էին վեճեր լինում: Կարծես ոչ մի բան չլիներ մեր մեջ' սեր, հասկացողություն: Հետո հայրս մահացավ, ես ստիպված եղա Թեհրան գնալ: Երբ վերադարձա, ինչպես ասում են' մի բան պիտի կորցնես, որ մի բան էլ ձեռք բերես, ինքնաբերաբար ամեն բան իր տեղն ընկավ, մենք միացանք ու դարձանք այն Աստղիկն ու Նարբեն, ում բոլորը ճանաչում էին: Սա մեր կյանքի ամենամեծ վեճն էր, որը չիմացանք, ոնց առաջացավ ու ինչպես հարթվեց»,- անկեղծացավ զրուցակիցս:

Նարբեն մեզ հետ խոսեց նաև ապագա երեխայի մասին պլաններից: «Իմ կյանքում շատ քիչ բան է, որ լինում է ոնց պատահի, ինձ մոտ ամեն ինչ հաշվարկած է: Ես կարծում եմ, որ երեխան պիտի ծնվի ապահով ընտանիքում: Հիմա, երբ մենք առավոտյան ութից մինչև գիշերը տասը, տասնմեկը աշխատում ենք, ո՞վ կամ ե՞րբ պիտի այդ երեխային խնամի, դաստիարակի: Երեխայի համար դեռ ժամանակը չի, երևի մեկ տարի հետո»:

Դերասան Նարբե Պողոսյանը կարծում է, որ զույգերն իրար լավ հասկանալու համար պետք է բնավորությամբ իրարից բավական տարբեր լինեն: «Ես ու Աստղիկը բացարձակապես տարբեր մարդիկ ենք, իրար ընդհանրապես նման չենք: Երևի հենց սա է պատճառը, որ ինչպես ասում են «մեկը զանգակ, մյուսը բամբակ» տարբերակով իրար փոխլրացնում ենք,-ժպիտով ավելացրեց զրուցակիցս»:

ArmStar.am-ի հետ զրույցի վերջում Նարբեն իր խոսքն ուղղեց իր լսարանին և առհասարակ հասարակությանը: «Ցավոք, ես վերջերս շատ եմ լսում այն մասին, թե իբր աշխատանք չկա, ո'չ, աշխատանք կա, պարզապես երիտասարդները պիտի ձգտում ունենան, փնտրեն, հեշտին չձգտեն»: Խոսակցության ընթացքում Նարբեն օրինակ բերեց նաև ArmStar.am-ի օրինակելի լրագրողին, ով, ինչպես դերասանը տեղյակ է, միանգամից մի քանի տեղ է աշխատում, այն էլ ինչպե~ս է աշխատում և…. և հասցնում է:

Ընտանեկան պատմությունը լսեց Աշխեն Մնացականյանը /ArmStar.am/