«Ազգ». Շանթ Ավետիսյանի նկարների շարքը 1,5 միլիոնով է վաճառվել

«Ահրամ Օն-լայն» արաբական կայքի փոխանցմամբՙ եգիպտահայ նկարիչ Շանթ Ավետիսյանի «Նեղոսի սրբապատկերները» նկարների շարքը (120 նկարներից բաղկացած) Քաթարում (Դոհա) կայացած «Սոթբիի» ժամանակակից արվեստի աճուրդի ժամանակ վաճառվել է ռեկորդային 1.565.000 դոլարով: Նախնական գինը 1 միլիոն է եղել: Ըստ մեկնաբաններիՙ սա ամենաբարձր գինն է, որ երբեւէ վճարվել է Մերձավոր Արեւելքում ստեղծագործող որեւէ նկարչի:

Շանթ Ավետիսյանը ծնվել է Կահիրեում 1951 թվին: Նրան ընդարձակ հոդվածով անդրադարձել է «Ազգը» իր «Մշակույթ» հավելվածում:

Ընդհանուր առմամբ Դոհայի աճուրդը ռեկորդային է եղել նաեւ «Սոթբիի» համար: Ստացվել է 15 միլիոն դոլարից ավելի գումար, որը գերազանցում է մինչ առայժմ Մերձավոր Արեւելքում գրանցված եկամուտները:

Դոհան ճանաչված է որպես արվեստի խթանման կենտրոն: Աճուրդի ներկայացված իրերը հիմնականում վաճառվել են խմբաքանակային ձեւով: Ընդգրկված են եղել արվեստագետներ Իրանից եւ արաբական երկրներից: Դոնալդ Ջադի «Անվերնագիր» շարքը վաճառվել է 3,5 միլիոն դոլարով, իսկ Ջուլի Մեհրետուի նկարների շարքըՙ 3 միլիոն դոլարով: Երրորդ ամենաբարձր գինը վճարվել է Շանթ Ավետիսյանի նկարաշարին: