Որ Արծվիկ Մինասյանը բարևում էր, Րաֆֆի Հովհաննիսյանն ո՞ւր էր

ՀՅԴ գերագույն մարմնի անդամ, պատգամավոր, Երևանի ավագանու ՀՅԴ ցուցակի առաջատար Արմեն Ռուստամյանը, այսօր լրագրողների հետ հանդիպմանը խոսելով Երևանի ավագանու ընտրությունների քարոզարշավի ընթացքի մասին, նկատեց, որ իշխանությունն ամեն ինչ անում է, որ Երևանի ավագանու ընտրությունները նսեմացվեն: Ըստ Արմեն Ռուստամյանի՝ մեր երկրում ընտրազանգվածը ձևավորվում է խնամի-բարեկամական, անձնական հարաբերությունների շնորհիվ, իսկ ՀՅԴ-ի խնդիրն է ապացուցել, որ այս ընտրությունները քաղաքական լուրջ նշանակություն ունեն:

Արմեն Ռուստամյանը համոզված է, որ ՀՀԿ-ն ամեն բան անում է, որ նույնիսկ մի գյուղապետ այլ կուսակցությունից չընտրվի, էլ ուր մնա, թե Երևանի քաղաքապետը տրվի ընդդիմադիր ուժի, քանի որ եթե Երևանի նման համայնքում զիջում տեղի ունենա, այդ դեպքում այս միահեծան համակարգի վերջը կդրվի:

Բանախոսի խոսքով՝ ՀՅԴ միակ խնդիրը մեր երկրում ամբողջական իշխանափոխության հասնելն է: «Այսօր մեր երկրում իրավիճակ է փոխվել: Եկել է մի շրջան, որ ժողովրդի ձայնը գնելը հեշտ չէ. մարդիկ այնքան են զզվել, որ այսօր կորցնելու բան չունեն: Իսկ ելքը միակն է՝ երկրում հասնել ամբողջական իշխանափոխության»,- ասաց Արմեն Ռուստամյանը:

Ասուլիսի ընթացքում Արմեն Ռուստամյանից լրագրողները հետաքրքրվեցին, չի տեսնում արդյոք նմանություն ՀՅԴ-ի և Րաֆֆի Հովհաննիսյանի քարոզարշավների միջև: Խոսքը հատկապես վերաբերում էր քաղաքացիներին հերթով բարևելուն, վերջինս պատասխանեց. «Բայց հո բարևը Րաֆֆի Հովհաննիսյանինը չի՞: Բարևն Աստծունն է: Եթե ուզում եք իմանալ, ամենաառաջին բարև տվողը եղել է մեր Արծվիկ Մինասյանը, որ 2009-ին բոլորին բարևում էր»: