Կառավարության կազմը չի փոխվի՝ բացի…

Մինչ օրս կառավարության կազմում հնարավոր փոփոխությունների ամենատարբեր վարկածներ էին շրջանառվում: Վերջին տեղեկություններով, սակայն, ամրապնդվում է այն վարկածը, որ նախագահ Սարգսյանը որոշել է կառավարությունում առհասարակ փոփոխություններ չանել՝ բացի, թերևս, մի հոգուց: Այդ «բացառիկը», ըստ մեր տեղեկությունների, Սպորտի և երիտասարդության հարցերի նախարար Հրաչյա Ռոստոմյանն է:

Ինչո՞ւ նախագահը որոշեց նման՝ ավելի քան ռիսկային քայլի գնալ:

Երկրում փոփոխությունների անհրաժեշտության մասին խոսվում էր Սերժ Սարգսյանի նախագահության առաջին իսկ ժամկետի մեկնարկից սկսած: Պաշտոնավարման առաջին շրջանում Սարգսյանը ձեռնպահ մնաց արմատական փոփոխություններից, ինչը պատճառաբանվեց նրանով, թե 2008թ. նախագահական ընտրությունների հետընտրական շրջան շալակած անձնավորության ձեռքերը կապված են, թե՝ … արդարացումները բազմաթիվ էին:

Վերջին ամիսներին, երբ արդեն իսկ ակնհայտ էր, որ ՀՀ-ի ղեկը առաջիկա հինգ տարիների ընթացքում դարձյալ Սարգսյանի ձեռքում է գտնվելու, անհրաժեշտ փոփոխությունների մասին սկսեցին բարձրաձայնել արդեն պարտադիր կարգով: Անգամ լրագրողների հետ հանդիպման ժամանակ բաց տեքստով կառավարության կազմի փոփոխության աննպատակահարմարության մասին նախագահի հայտարարությունից հետո դեռևս հույսեր փայփայվում էին առ այն, որ այս աստիճան ծայրահեղ հակադիր վերաբերմունք առկա խնդիրներին, դժվար թե լինի:

Պարզվում է, սակայն, որ ամբողջ հարցը հենց հակադրվելու մեջ է: Նախադպրոցական տարիքում շատ երեխաների մոտ նկատելի է մեծերի խոսքին հակառակվելը, ասվածին հակառակ վարք դրսևորելը. այդ երևույթն անվանում են նեգատիվիզմ: Նախագահ Սարգսյանի մոտ, ըստ էության, կարծես թե հասուն նեգատիվիզմի երևույթներ են ի հայտ եկել՝ ի տարբերություն, իհարկե, փոքր երեխաների, այն դրդապատճառավորված է և խորապես կշռադատված:

Փոփոխություններ ոչ թե չեն լինի, այլ փոփոխություններ չեն լինի հիմա՛, երբ այդ մասին թմբկահարում և պահանջում են իրենց Սերժ Սարգսյանից ավելի հասկացող ու պետության ճիշտ կառավարման մասին պատկերացում վերապահող ուժերը: Որոշումն ընդունվել է՝ ելնելով նրանից, որ եթե հենց այս շրջանում դա արվեր, կարող էր մեկնաբանվել որպես ճնշում, պարտադրանք և փոփոխությունների պահանջով հանդես եկող ուժերը կարող էին հաղթողի կեցվածքով ման գալ:

Փոփոխություններ կլինեն: Փոփոխությունները, սակայն, կլինեն միայն նախագահ Սարգսյանի ընկալմամբ՝ առավել նպատակահարմար պահին:

Երեք օրից ՀՀԿ-ին ևս մեկ ստուգատես է սպասվում՝ Երևանի ավագանու խորհրդի ընտրությունների տեսքով, որից հետո արդեն երկիրը կմտնի ազատ շունչ քաշելու ժամանակահատված: Սերժ Սարգսյանն, ինչպես հայտնի է, ամենաշատը սիրում է շախմատ խաղալ և այս խաղը՝ շնորհիվ վերջինիս նախասիրության, շատ հաճախ է դրվում այս կամ այն քաղաքական որոշման շարժառիթները հասկանալու հիմքում: Կադրային փոփոխությունների առումով ևս Սարգսյանը, ամենայն հավանականությամբ, կառաջնորդվի դարձյալ շախմատիստի՝ իր սիրած ոճով, ինչը հենց սկզբից էլ ենթադրվում էր: Ըստ էության, Սերժ Սարգսյանի անցած ուղին, տարբեր պաշտոնների ժամանակ դրսևորած մարտավարությունը հաշվի առնելով՝ կարելի է հասկանալ, որ Հայաստանի Հանրապետության այս նախագահը կտրուկ քայլերի, հանկարծակի որոշումների, արմատական ու ծայրահեղ քաղաքականության կողմնակիցը չէ: Իհարկե, կարող է անել քայլեր, որ տվյալ պահին հանկարծակիի բերեն շատերին, չհասկացվեն, թվան անտրամաբանական կամ չափից ավելի արմատական (ինչպես հայ-թուրքական ֆուտբոլային դիվանագիտությունը), սակայն որոշ ժամանակ հետո ավելի գլոբալ լույսի ներքո դրանց վերլուծությունը ցույց է տալիս, որ քայլերն արված էին ավելի քան հաշվարկված, ավելի քան հիմնավոր և ավելի քան լուրջ ու տարողունակ հարցեր էին լուծում, քան դա կարող էր թվալ շարքային քաղաքացիներին և անգամ իրենք իրենց քաղաքական գայլեր համարողներին:

Կադրային փոփոխությունների հարցում ևս Սերժ Սարգսյանը հավատարիմ է մնալու շախմատիստի իր հոտառությանը: Ավագանու ընտրություներից հետո առաջիկա չորս տարիներին այլևս ոչ մի ընտրություն չկա, ժամանակը լիուլի է ամեն ինչ հասցնելու համար: 

Փոփոխությունները կարվեն հանգիստ, առանց շտապելու և առանց ցնցումներ թույլ տալու:

Լուսինե Կեսոյան