Ժաննա Բուտուլյանի կյանքի նոր փուլը

Սերիալային դերասանուհի Ժաննա Բուտուլյանը, ում դեբյուտային դերը եղավ «Դժվար ապրուստ» հեռուստասերիալում Սյուզկայի կերպարը, սերիալի ավարտից հետո այլ հեռուստանախագծում հանդես չեկավ ու արդեն 2 ամիս է, ինչ հեռուստադիտողները նրանից տեղեկություն չունեն: esyes.am-ը հետաքրքրվել է, թե ինչով էր այս ընթացքում զբաղված Ժաննան և առաջիկայում ինչ անելիքներ ունի:

Մեզ հետ զրույցում Ժաննան հայտնեց, որ այս ընթացքում նախ մի լավ հանգստացել է, ապա զբաղվել իրենով: «Այս ընթացքում լիարժեք հանգստանում էի ու արդեն վերականգնել եմ ուժերս: Սպորտով եմ զբաղվում, պարի գնում, արտաքինիս հետևում: Վերջապես ժամանակ ունեցա հետևողական լինել իմ նկատմամբ, ոչ թե մի օր զբաղվեմ սպորտով, մի օր՝ ոչ: Այս ընթացքում մի օր մարզասրահ էի գնում, մի օր՝ պարի,- ասաց Ժաննան ու հավելեց, որ նախկինում ևս զբաղվել է և սպորտով, սակայն նկարահանումների ժամանակ ոչ միշտ էր կարողանում գնալ մարզասրահ, քանի որ չուներ ֆիքսված գրաֆիկ՝ աշխատանքային ժամի սկիզբ և ավարտ: -Պարի փոքր տարիքում եմ գնացել, հետագայում արդեն լողով եմ զբաղվել: Այսինքն՝ տարբեր ժամանակահատվածներում տարբեր սպորտաձևերով եմ զբաղվել»:

Անդրադառնալով արտաքինին հետևելուն՝ Ժաննան նշեց, որ նկարահանումների համար արվող ամենօրյա դիմահարդարումը վատ է անդրադառնում մաշկի վրա և ինքն այս ընթացքում փորձել է քիչ դիմահարդարվել և խնամել մաշկը:

Սերիալային դերասանուհին ասաց, որ այս ընթացքում մի քիչ աչքաթող էր արել ընկերներին, հարազատներին, որոնց առաջ փորձում է «մեղքերը» քավել և նրանց հետ անցկացնել ժամանակը: Օգտագործելով հանգստի շրջանն ու ազատ ժամանակը՝ Ժաննան նաև գրքեր է կարդացել, որոնցից առանձնացրեց Բալզակի «Շագրենի կաշին». «Երբ «Դժվար ապրուստի» նկարահանումները նոր էր սկսվում, կարդում էի Բալզակի «Շագրենի կաշին»: Սակայն կիսատ թողեցի այն, քանի որ էներգիա չէր մնում կարդալու համար: Ֆիլմի ավարտից հետո նորից սկսեցի կարդալ այդ գիրքը: Կարծում եմ՝ շատ ճիշտ էր, որ ես հիմա դա կարդացի, քանի որ այժմ այլ կերպ հասկացա այդ գրքի իմաստը: Հիմա այլ կերպ եմ գնահատում կյանքն ու նայում իրերին. սկսել եմ չշտապել և ավելի ռեալ նայել կյանքին: Նախկինում մի համոզմունք ունեի՝ որքան էլ մեզնից շատ բան է կախված, ամեն ինչ լինելու է այնպես, ինչպես լինելու է: Եկավ մի պահ, երբ սկսեցի մտածել, որ ամեն ինչ ինձնից է կախված, սակայն հիմա կրկին հանգել եմ նախնական կարծիքիս՝ այն, ինչ պետք է լինի, որքան էլ պայքարես, միևնույնն է, գալու է ու կանգնի ճանապարհիդ»:

Առաջիկա ծրագրերի մասին խոսելիս Ժաննան նշեց, որ ցանկանում է զուգահեռել իր առաջին մասնագիտությամբ՝ որպես հոգեբան և որպես դերասանուհի աշխատելը. «Այս ընթացքում վերապատրաստվել եմ որպես հոգեբան, իմի եմ բերել գիտելիքներս և աշխատելու հեռանկարներ ունեմ: 2010 թվականին՝ մագիստրոսի կոչում ստանալուց հետո, աշխատել եմ իմ մասնագիտությամբ, սակայն հետո սկսեցի նկարահանվել «Դժվար ապրուստում»»:

Ժաննայից տեղեկացանք, որ այս ընթացքում ունեցել է հեռուստանախագծերում հանդես գալու առաջարկներ, սակայն շատ հոգնած լինելու պատճառով չի համաձայնել. «Եթե միանգամից ընդգրկվեի այլ նախագծում, դեռ հոգնած կլինեի, ամեն ինչ նույն ձևով կընկալեի ու ժամանակի ընթացքում կսպառվեի: Իսկ հիմա վերականգնված ուժերով արդեն պատրաստ եմ կյանքի նոր փուլի: Այժմ դեռ չկա այնպիսի առաջարկ, որին կսիրահարվեմ, իսկ ինձ համար աշխատանքում շատ կարևոր է սիրահարվելն այն ամենին, ինչ անում եմ: Սակայն ցանություն կա ու հաստատ վերադառնալու եմ եթեր, որովհետև արդեն կարոտում եմ նկարահանման պրոցեսը»:

Խոսելով անձնականի մասին հոգեբան-դերասանուհին ասաց, որ ընտրյալ չունի, սակայն իր ինտուիցիան հուշում է, որ կյանքի նոր փուլում նաև դա էլ կլինի. «Այնպես չէ, որ սիրտս զբաղված է, դրա համար եմ այդպես ասում, ուղղակի ինտուիցիաս է այդպես հուշում, իսկ ես միշտ վստահում եմ նրան»: