Իր հրճվանքը չթաքցրեց ՀԱԿ-ի առաջնորդը. Ռուբեն Հակոբյան

«Մեկ տարվա ընթացքում արդեն երրորդ շատ կարևոր ընտրություններն են մոտենում ավարտին: Ի սկզբանե մեր դիրքորոշումը եղել է, որ այս ընտրությունների միջոցով պետք է կարողանանք իրականացնել համակարգային փոփոխություն»: Այս մասին այսօր Ազգային ժողովում լրագրողների հետ հանդիպման ժամանակ ասաց «Ժառանգություն» խորհրդարանական խմբակցության ղեկավար Ռուբեն Հակոբյանը:

Վերջինիս խոսքերով` իրենց գնահատմամբ՝ ավագանու ընտրություններն ունեն բացառիկ քաղաքական նշանակություն, «որովհետև այստեղ խոսքը գնում է ինչ-որ մի օղակում իշխանական մեծամասնության այս մենաշնորհը ջարդել, կոտրել կարողանալու մասին, որը հանդիսանում է պետության զարգացման հիմնական խոչընդոտը»,-ասաց Հակոբյանը, հավելելով, որ ընդդիմութունն այսօր կարող է կասեցնել իշխանության քաղաքական մենաշնորհը:

«Ընդդիմությունը, ավելի ճիշտ՝ ոչ իշխանական ուժերը, կարող են անել այն, ինչ չկարողացան անել փետրվարի 18-ին: Նրանք, պետք է խոստովանեմ, բացառիկ քաղաքական էգոիզմ ցուցաբերեցին նախագահական ընտրությունների ժամանակ: Ճիշտ է, մի կողմից հայտարարվում էր, որ իրենք կողմ են իշխանափոխությանը, և կողմ են ժողովրդական շարժմանը, որը առաջնորդվում էր Րաֆֆի Հովհաննիսյանի կողմից, բայց գործնականում ամեն ինչ արեցին, որ տապալվի այդ ժողովրդական շարժումը: Եվ դա ավելի երևաց ՀԱԿ-ի հիմնադիր համագումարի ժամանակ, որի ընթացքում իր հրճվանքը չթաքցրեց ՀԱԿ-ի առաջնորդը և քաղաքական մահախոսական կարդաց Րաֆֆի Հոհաննիսյանի վերաբերյալ: