«Tip Tap». նոր տեսահոլովակ Եվայից (տեսանյութ)

Երգչուհի Եվային, ով իր ձայնով և ուրույն ձեռագրով տարբերվում է շատ երգիչ-երգչուհիներից, կարելի էր տեսնել դեռ 2003-ից՝ «Կանաչ գոտի» նախագծի շրջանակներում:

Եվայի առաջին տեսահոլովակը նկարահանվել է 2007-ին, որը վերջինիս առաջին լուրջ քայլն էր դեպի մեծ բեմ: Տեսահոլովակը նկարահանվել էր «Ես՝ ես եմ» երգի հիման վրա:

Օրերս Եվան նկարահանել է նոր տեսահոլովակ՝ «Tip Tap» երգի հիման վրա: Տեսահոլովակի նկարահանման, երգի, Եվայի առաջիկա ծրագրերի մասին Լուրեր.com-ը զրուցեց երգչուհու հետ:

-Արդեն պատրաստ է Ձեր նոր տեսահոլովակը: Ձեր գրեթե բոլոր երգերը հեղինակային են, սա և՞ս հեղինակային ստեղծագործություն է:

-Այս անգամ ես կատարել եմ Մանե Հակոբյանի հեղինակած երգը: Երգը բավականին յուրահատուկ է և տարբերվում է էստրադային շատ կատարումներից: Բայց շուտով կնկարահանեմ ևս մեկ տեսահոլովակ, որի երաժշտությունը կլինի հեղինակային:

-Ո՞վ է ռեժիսորը: Տեսահոլովակը սյուժե ունի՞:

-Քանի որ երգն ակտիվ է, տեսահոլովակն էլ որոշեցինք ակումբային ոճի մեջ նկարահանել՝ առանց սցենարի: Ռեժիսորը կրկին Հրաչյա Մեսրոպյանն է՝ իմ «Հայ տղա» երգի տեսահոլովակի ռեժիսորը:  

-Ասացիք՝ շուտով կլինի նոր տեսահոլովակ,երաժշտությունն էլ՝ հեղինակային: Հանդիսատեսը ե՞րբ սպասի տեսահոլովակին: 

-Հաջորդ տեսահոլովակի նկարահանման աշխատանքները կսկսեմ 15 օրից. այն, կարծում եմ, պատրաստ կլինի մինչև հուլիս ամիսը: Երգի երաժշտության հեղինակը կլինեմ ես: Ցանկանում եմ տեսահոլովակներս հանդիսատեսի դատին ներկայացնել որոշակի ընդմիջումներով: Մինչև տարեվերջ կնկարահանվի ևս երկու տեսահոլովակ:

-Ստացվում է՝ մեկ տարվա ընթացքում նկարահանելու եք 4 տեսահոլովակ: Չե՞ք պատրաստվում ձայնասկավառակ թողարկել կամ հանդես գալ համերգային ծրագրով:

-Մինչև տարեվերջ կունենամ մեկ ձայնասկավառակ, որում կլինեն նաև հեղինակային երգեր: Համերգային շրջագայության էլ եմ գնալու. համերգներ ունեմ Իսպանիայում, Իտալիայում, Ֆրանսիայում:

Մայիսի 24-ը ծննդյանս օրն է: Դեռ երկու տարի առաջ ծննդյանս օրվա կապակցությամբ Երգի պետական թատրոնում մենահամերգով հանդես եկա: Այս տարի ևս ցանկանում եմ ծննդյանս օրվա կապակցությամբ որևէ միջոցառում կազմակերպել:

Կարծում եմ՝ հանդես կգամ ակումբային մենահամերգով, քանի որ, ըստ իս, այդպես ավելի հաճելի կլինի և՛ ինձ համար, և՛ հյուրերիս, և՛ հանդիսատեսի համար: 

Գայանե Համբարձումյան