Նոր առցանց գործիք՝ ընտանեկան բժիշկների համար

ՀՀ առողջապահության նախարարության և ԱՄՆ Միջազգային զարգացման գործակալության (ԱՄՆ ՄԶԳ) աջակցությամբ Հայկական ակնաբուժության նախագիծը (ՀԱՆ) վերջին տարիների ընթացքում մարզերի առաջնային օղակի շուրջ 2000 բուժաշխատողների և ընտանեկան բժիշկների համար իրենց բնակավայրերում կազմակերպել է վերապատրաստման դասընթացներ, որոնց հիմքում ՀԱՆ-ի հեղինակած «Աչքի հիվանդություններ» ձեռնարկն է՝ հայերենով առաջին ակնաբուժական թեմայով հրատարակություններից մեկը նորանկախ Հայաստանի պատմության մեջ:

Այս դասընթնացները զգալիորեն նպաստել են բազմաթիվ ընտանեկան բժիշկների և բուժքույրերի մասնագիտական որակի բարձրացմանը: ՀԱՆ-ի կողմից այժմ կատարվել է հերթական քայլը։ Մշակվել է առցանց մի գործիք, որն առաջնային օղակի բուժաշխատողներին հնարավորություն կտա արդեն համացանցի միջոցով կրկին վերհիշել անցած դասընթացները կամ հարստացնել գիտելիքները:

Թեստը նախատեսված է այն մասնագետների համար, ովքեր ցանկանում են զարգացնել և ամրապնդել իրենց գիտելիքներն ակնային խնամքի և աչքի հիվանդությունների վերաբերյալ:

Հիմքում նույն «Աչքի հիվանդություններ» ձեռնարկն է:

Առցանց գործիքից կարելի է օգտվել հետևյալ հղումով։

Հայաստանի մանուկներ հիմնադրամի (COAF) հետ սերտ համագործակցությամբ հաջողվեց ՀԱՆ-ի փորձարարական այս նոր նախաձեռնությունը ի մի բերել: Հիմնադրամը ՀԱՆ-ի վաղեմի գործընկերներից է, և ցուցաբերած աջակցությունը Հայաստանում առողջապահական համակարգի բարելավմանն ուղղված ևս մեկ քայլ է:

Արմավիրի և Արագածոտնի մարզերի 9 ընտանեկան բժիշկ առցանց պատասխանեցին երեք փուլով կազմված հարցերին, ինչն իսկապես ոգևորիչ արդյունք է:

Նախաձեռնության հաջող մեկնարկը նշանավորվեց ապրիլի 25-ին, երբ Արմավիրի մարզպետարանում թեստն անցած ընտանեկան բժիշկները հավաստագրեր ստացան:

Գրանցված արդյունքները և արձագանքները թույլ են տալիս նախաձեռնության զարգացման իրական հեռանկարներ ակնկալել: Գաղափարն արդեն իսկ ներկայացվել է Կոտայքի մարզում: Շուտով այս հնարավորության մասին կտեղեկացվեն նաև ՀՀ այլ մարզերի բժիշկները: