Արտոն լավատես է

Ֆիզիոգնոմիկ վերլուծության հերթական «օբյեկտը» երաժիշտ և հետաքրքիր մտածող Արթո Թունջբոյաջյանն է: Ահա թե ինչ է պարզվել վերլուծության արդյունքում:

Նա լավատես է և այդ լավատեսութունն ի ծնե է: Նա կայուն ու կենսուրախ բնավորություն ունի: Ընդհանուր առմամբ, արտասովոր անձնավորություն է: Այդ տիպի դեմք ունեցող մարդիկ միշտ էլ առանձնանում են պարզությամբ: Նայելով նրան՝ իսկույն նկատելի է դեմքի կառուցվածքի որոշակի նմանությունը լեգենդար սցենարիստ, ֆանտաստ գրող Սթիվեն Քինգի հետ («Փախուստ Շոուշենկից», «Կանաչ մղոն»): Ինչպես Սթիվեն Քինգը, այնպես էլ Արտոն, աչքի է ընկնում ոչ ստանդարտ մտածելակերպով: Արտոն Քինգից տարբերվում է բարեխղճությամբ ու խելամտությամբ, իսկ Քինգը Արտոյից՝ հիվանդ երևակայությամբ ու տարօրինակություններով. թեև ով գիտե: Այսպիսով, Արտոյի տիպի դեմքով հիմնականում հանդիպում են արվեստագետներ, նորարարներ, ճանապարհորդներ, ճարտարապետներ, դիզայներներ և ռեժիսորներ, իսկ հազվադեպ՝ ճարտարագետներ, մարզիկներ ու քաղաքական գործիչներ:

Միակ թերությունը կարող է լինել քնելու սխալ ռեժիմը: Կարելի է նաև ենթադրել, որ Արտոն գիշերային մարդ է, և նրա աշխատունակությունը բարձր է հենց գիշերը:

Գլխի ընդհանուր կառուցվածքը հուշում է, որ մեր հերոսը հավասարակշռված է, սիրում է փոփոխություններ աշխատանքում, բայց ոչ անձնական կյանքում և կենցաղում: Ինչպես նաև պարզ է դառնում, որ Արտոն սիրում է ճամփորդել: Հնարավոր է՝ մեր հերոսը կամ վախենում է, կամ իրեն այնքան էլ լավ չի զգում փակ ու նեղ տարածքում: Արտոյի տիպի մարդիկ պարզապես դատապարտված են զբաղվելու իրենց սիրած գործով, քանի որ այլ կերպ չեն կարող ապրել: Նրանք նվիրվում են աշխատանքին և ողջ ուժերը կենտրոնացնում դրա վրա: Արտոյի էներգետիկան բավական ուժեղ է և իր աշխուժությամբ ու լավատեսությամբ վարակում է բոլորին:

51-77 տարեկանում Արտոյի դեմքի տիպով մարդկանց բնավորությունը կտրուկ փոխվում է: Այդ տարիքում մարդիկ ավելի հուզական են դառնում:

Նրա կզակի «շրջակայքում» արտահայտված է, ասպես ասած, «լավատեսության ծալքը»: Այսպիսի ծալքով մարդիկ շփվող են, երբեմն՝ շատախոս: Այս ծալքը հիմնականում առաջանում է հաճախ ժպտալուց, ուստի կարելի է ենթադրել, որ Արտոն ժպտերես է:

Դիտարկելով երգչի հոնքերը՝ պարզ է դառնում, որ մեր հերոսը կենսուրախ է, համեստ, անկեղծ ու բարի: Այսպիսի հոնքերով մարդիկ երջանիկ են ամուսնական կյանքում և շատ կապված ընտանիքին:

Աչքերից կարող ենք եզրակացնել, որ նա ինքնուրույն է, անկախ և հույսը միայն իր վրա է դնում, համբերատար է ու հեռատես: Երգչի քիթը վկայում է, որ նա ծախսող է, առանձնապես չի կարևորում ֆինանսները: Այդպիսին կարող են լինել միայն իսկական արվեստագետները: Կարելի է ենթադրել, որ Արտոն կոլեկցիոներ է, ունի ինչ-որ իրերի հավաքածու:

Ականջներից պարզ է դառնում, որ նա ընդունակ է լսել դիմացինին. նրա առաջ մարդիկ կարող են բացել իրենց սիրտը, քանի որ նա շատ վստահելի անձնավորություն է:

Ի մի բերելով Արտոյի բոլոր տվյալները՝ ստացվում է հետևյալ պատկերը. Արտո Թունջբոյաջյանն իսկական արվեստագետ է, լավատես է, կենսուրախ ու ժպտերես, համբերատար է ու հեռատես, ինքնուրույն է ու անկախ, ունի ուրույն մտածելակերպ, սիրում է փոփոխություններ աշխատանքում, բայց՝ ոչ անձնականում, նվիրված է ընտանիքին, առողջ է, մի քիչ շատախոս, ծախսող է, չի սիրում փակ տարածքներ, զբաղվում է սիրած գործով, գործի նվիրյալ է, հավասարակշռված, սիրում է ճամփորդություններ ու փորձարարություններ, գիշերային մարդ է, հավանաբար ունի վնասակար սովորություններ: Նախանձելի աշխատասիրություն ու հզոր էներգետիկա ունի: Արտո Թունջբոյաջյանը հազվադեպ հանդիպող անհատ է:

- Իմ մասին ներկայացված կարծիքն իրականում շատ մոտ է ինձ: Ես իսկապես լավատես եմ, կենսուրախ: Զբաղվում եմ սիրածս գործով, որն իմ հոբբին է: Այն ամենին, ինչին հասել եմ, իմ աշխատանքի շնորհիվ է: Միշտ ուշադիր եմ եղել այն ամենին, ինչ կատարվում է շուրջս, ինչ կարելի է տեսնել ժողովրդի մեջ: Իսկապես համբերատար եմ և միշտ ձգտում եմ որևէ մեկին վնաս չպատճառել:

Ասում եք՝ շատախոս եմ. բայց ես անտեղի չեմ խոսում: Խոսում եմ, որովհետև չեմ կարող անտարբեր լինել, որովհետև կան հնարավորություններ և հույս: Երբ տեսնում եմ, որ մարդը ճիշտ ուղի է բռնել, երբ տեսնում եմ տաղանդ ունի, չեմ խոսում: Մարդ կա՝ չի գտել ճիշտ ճանապարհը: Սիրտս չի դիմանում անտարբեր մնալուն, խոսում եմ՝ հույսով, որ մի օր կհասկանա ու կգտնի կյանքում իր ճանապարհը:

Ասում եք՝ կոլեկցիոներ եմ: Ես չունեմ ինչ-որ իրերի հավաքածու: Ես միայն կյանքից եմ հավաքածուներ ստեղծում. հավաքում եմ իմ մեջ կյանքի փորձը, փոփոխությունները, իմ տպավորությունները:

Ես երբեք չեմ դադարում աշխատել և գիտեմ, որ դեռ շատ բան կա անելու: Կրկնում եմ նույն բաները, որովհետև դեռ չկա սեր, հարգանք, ճշմարտություն: Մենք դեռ չենք ապրում այս բառերի իմաստը, պետք է հասկանանք դրանց իմաստը:
Շնորհակալություն,– Արթո Թունջբոյաջյան։

Վերլուծեց՝ Գրիշա Նուրիջանյանը

«Ե՞ս Yes!» ամսագիր, արխիվ