Ֆրանսուա Օլանդի կինը ֆրանսիացիներին 3 անգամ ավելի էժան է նստում, քան Սարկոզիի կինը

Ֆրանսիայում աջակողմյան «Ազգային շարժման աջակցության միություն» կուսակցության պատգամավոր Գիյոմ Լարիվեն հարցում է ուղարկել Ֆրանսիայի առաջին տիկին, Ֆրանսուա Օլանդի կին Վալերի Տրիերվեյլերի վրա պետության կողմից հատկացվող գումարների և ծախսերի քանակը պարզելու նպատակով: Պարզվել է, որ ամսական երկրի նոր առաջին տիկինը ծախսում է 20.000 եվրո: Այդ գումարներն ամբողջովին գնում են ծառայող անձնակազմի աշխատավարձը վճարելուն: Օլանդի կինն օգտվում է 5 աշխատակցի ծառայությունից:

Իսկ ահա նրա նախորդ առաջին տիկինը` Նիկոլա Սարկոզիի կին Կարլա Բրունիին սպասարկում էին 8 ծառայողներ, և նրանց ամսական աշխատավարձը կազմում էր ավելի քան 36.000 եվրո՝ ընդհանուր վերցրած: Բացի այդ, Սարկոզիի տիկնոջ պաշտոնական կայքը ֆրանսիացիներին արժենում էր ամսական 26.000 եվրո: Այսպիսով` պետական գանձարանը նախկին առաջին տիկնոջ վրա ծախսում էր ամսական ավելի քան 62.000 եվրո. գրում է Russia Today-ը: