Իշխան Զաքարյանի հրավերով՝ Երևան կժամանի ԱՄԷ Վերահսկիչ պալատի նախագահի գլխավորած պատվիրակությունը

ՀՀ Վերահսկիչ պալատի նախագահ Իշխան Զաքարյանի հրավերով պաշտոնական այցով մայիսի 7-9 ը Երևան կժամանի Արաբական Միացյալ Էմիրությունների (ԱՄԷ) Վերահսկիչ պալատի նախագահ դոկտոր Հարիբ ԱԼ Ամինի գլխավորած պատվիրակությունը:

Այցի ընթացքում նախատեսվում է ստորագրել hամագործակցության պայմանագիր: Պատվիրակությունը կայցելի նաև Ծիծեռնակաբերդի հուշահամալիր և Մադենադարան :

Հայաստանի և ԱՄԷ բարձրագույն վերահսկիչ մարմինների շփումներն ակտիվացել են վերջին երկու տարիների ընթացքում: 2011 թվականին ՀՀ վերահսկիչ պալատի նախագահ Իշխան Զաքարյանի Աբու Դաբի կատարած պաշտոնական այցի ընթացքում կողմերը պայմանավորվածություն էին ձեռք բերել ակտիվացնել երկխոսությունն ու զարգացնել համագործակցությունը:

Արաբական Միացյալ Էմիրությունների (ԱՄԷ) բարձրագույն վերահսկիչ մարինը ստեղծվել է 1971 թ.-ին:

ԱՄԷ գերագույն ղեկավարությունը վերահսկիչ կառույցի առջև դրել է հստակ խնդիր' լինել աշխարհի լավագույն վերահսկիչ մարմինների տասնյակում:

ԱՄԷ բարձրագույն վերահսկիչ մարմինը 2007 թվականից ղեկավարում է դոկտոր Հարիբ Ալ Ամինին: Վերջինս նշանակվել է ԱՄԷ Դաշնային խորհրդի կողմից' անժամկետ:

Հարիբ Ալ Ամինին ԱՄԷ-ում հայտնի է որպես հաջողված պետական բարձրաստիճան պաշտոնյա: Տնտեսագիտության դոկտոր է և ունի նախարարի կարգավիճակ: Մինչ նշանակումը ավելի քան 25 տարի ծառայել է Զինված ուժերում, որից հետո աշխատել է նաև ԱՄԷ Նախագահի աշխատակազմում:

Բոլոր պետական մարմիններն ու կազմակերպությունները և նույնիսկ մասնավոր ընկերությունները, որոնցում Էմիրություններն ունի 25% մասնաբաժին, Վերահսկիչ մարմնի կողմից պարտադիր կարգով յուրաքանչյուր տարի ստուգվում են: Չկա որևէ պետական նշանակության հաշվետվություն, որը չուսումնասիրվի և չհամաձայնեցվի վերահսկիչ մարմնի կողմից:

Դոկտոր Հարիբի ղեկավարման ընթացքում ԱՄԷ բարձրագույն վերահսկիչ մարմնի աշխատանքը դարձել է առավել արդյունավետ և ժամանակակից, մասնավոապես' տեղեկատվական և բարձր տեխնոլոգիաների շնորհիվ վերահսկողությունն իրականացվում է ՙառանց թուղթ՚ ռեժիմի: Առհասարակ, միջազգային լավագույն փորձը հմտորեն ներդրվում և զարգացվում է, աշխատակազմը հագեցած է միջազգային կարգի մասնագետներով:

Էմիրությունների փորձն ուսանելի է տեղեկատվական տեխնոլոգիաների վերահսկողության բնագավառում: Պետական հատվածում ահռելի գումարներ են ծախսվում էլեկտրոնային կառավարման համակարգերի ձևավորման և զարգացման նպատակով. այդ առումով ԱՄԷ բարձրագույն վերահսկիչ մարմինը հաջողությամբ կարողանում է ուսումնասիրել այդ ծրագրերի ամբողջականությունն ու արդյունավետությունը:

Ուշագրավ է նաև այն, որ ԱՄԷ բարձրագույն վերահսկիչ մարմինը ֆինանսական խախտում հայտնաբերելու դեպքում օրենքով սահմանված կարգով կարողանում է վերահսկվող օբյեկտի համապատասխան ներկայացուցչին ենթարկել պատասխանատվության' նշանակելով նախազգուշացում, նկատողություն, օրենքով սահմանված կարգով աշխատավարձի իջեցում, զբաղեցրած պաշտոնից ազատում, պաշտոնի իջեցում մեկ աստիճանով, այլ իրավունքներից զրկում:

ԱՄԷ բարձրագույն վերահսկիչ մարմինն ունի ակնհայտ ֆինանսական անկախություն գործադիր իշխանությունից, մասնավորապես վերահսկիչ մարմնի նախագահը կառույցի տարեկան բյուջեի նախագիծն ի սկզբանե համաձայնեցնում է Ազգային խորհրդի հետ, որից հետո գործադիր իշխանությունն այդ նախագիծն առանց կրճատելու կամ փոփոխություն կատարելու հնարավորության պարզապես ներառում է պետական բյուջեում:

Կառույցը Բարձրագույն վերահսկիչ մարմինների միջազգային, արաբական և ասիական կազմակերպությունների (INTOSAI, ARABOSAI, ASSOSAI) բավականին ակտիվ անդամ է և պատրաստվում է 2016-2019թթ. ժամանակահատվածում նախագահել Բարձրագույն վերահսկիչ մարմինների համաշխարհային կազմակերպությունը:

ՀՀ ՎՊ լրատվական ծառայություն