Ապագա մանկավարժները՝ ԱԻ նախարարությունում

Օրերս Խ.Աբովյանի անվան հայկական պետական մանկավարժական համալսարանի պատմության և իրավագիտության ֆակուլտետի 3-րդ կուրսի ուսանողներն Առաջին բուժօգնության, արտակարգ իրավիճակների և քաղպաշտպանության ամբիոնի դասախոս Պերճ Կարապետյանի նախաձեռնությամբ «Արտակարգ իրավիճակներ և քաղպաշտպանության հիմնահարցեր» առարկայի շրջանակում այցելել էին ՀՀ ԱԻ նախարարություն:

Այցի ընթացքում ուսանողները եղան նախարարության մի շարք ստորաբաժանումներում, ծանոթացան դրանց կառուցվածքին ու հիմնական գործառույթներին։

«Սեյսմիկ պաշտպանության ծառայություն» գործակալության մասնագետները պատկերային ներկայացումների միջոցով ուսանողներին ծանոթացրին երկրաշարժից պաշտպանվելու վարքականոններին՝ մանրամասն պատմելով, թե ինչ է անհրաժեշտ անել երկրաշարժից առաջ, դրա ժամանակ և հետո:

Խոսելով անվտանգության կանոնների մասին՝ մասնագետներն ապագա մանկավարժներին հորդորեցին երկրաշարժի հետևանքները նվազագույնի հասցնելու համար լինել առավել տեղեկացված:

Անդրադարձ եղավ նաև երկրաշարժի դեպքում պատվարների անվտանգությանն ու ջրամբարների վրա սեյսմիկ ազդեցության միջազգային փորձին:

Ուսանողների հաջորդ հանդիպումը Հատուկ հրշեջ ջոկատի անձնակազմի հետ էր։ Ջոկատում ուսանողներին պատմեցին տագնապի և հրդեհաշիջման ժամանակ տարվող աշխատանքների, ինչպես նաև հրշեջ և փրկարարական մեքենաների դասակարգման և արտակարգ իրավիճակներում դրանց արձագանքման գործընթացին:

Հատկապես հետաքրքիր էր ծանոթանալ հնացած թթվածնային մեկուսիչ հակագազերին փոխարինած «Պրոֆի» տիպի շնչառական ապարատների կիրառության ձևին:

ՀՀ ԱԻՆ Ճգնաժամային կառավարման կենտրոնում ուսանողները ծանոթացան կենտրոնի աշխատանքներին և տեխնիկական հնարավորություններին:

Այստեղ ուսանողներին ներկայացրին, թե ինչպես են նախարարության ստորաբաժանումներն իրական ժամանակում տարբեր համակարգերի միջոցով վերահսկում բնական և տեխնածին բնույթի արտակարգ իրավիճակները:

Հանդիպման ավարտին ԱԻՆ աշխատակիցները գոհունակություն հայտնեցին Մանկավարժական համալսարանի ուսանողների իմացության մակարդակից: