ՀՖՖ-ն նոր խաղադաշտ կբացի «Մխիթար Սեբաստացի» կրթահամալիրում

«Մխիթար Սեբաստացի» կրթահամալիրի պատանի ֆուտբոլիստների թիմը, որ մայիսի 3-ին մասնակցել էր Հայաստանի ֆուտբոլի ֆեդերացիայի կողմից Շուշիի նորակառույց մարզադաշտի հանդիսավոր բացմանը եւ հանդիպում էր ունեցել տեղի դպրոցականների հետ, նրանց նախանձելու երկար առիթ չունեցավ: ՀՖՖ նախագահ Ռուբեն Հայրապետյանը վերադառնալով Շուշիից, այսօր այցելեց «Մխիթար Սեբաստացի» կրթահամալիր' ծանոթանալու համալիրի ենթակառուցվածքներին եւ գտնելու Շուշիում սերբաստացիներին տված խոստման' նոր խաղադաշտի կառուցման հնարավոր լուծումները: ՀՖՖ նախագահը «Մխիթար Սեբաստացի» կրթահամալիրի տնօրեն Աշոտ Բլեյանի ուղեկցությամբ շրջեց համալիրում, համալիրի հարակից տարածքներում, ուսումնասիրեց խաղադաշտի կառուցման համար պիտանի ենթակառուցվածքները:

ՀՖՖ նախագահի հանձնարարությամբ առաջիկայում կսկսվի «Մխիթար Սեբաստացի» կրթահամալիր արհեստական խոտածածկով եվրոպական չափանիշներին համապատասխան խաղադաշտի կառուցման աշխատանքները, որը սեբաստացիներին կհանձնվի սեպտեմբերի 1-ին' նոր ուսումնական տարվա սկզբին:

Հայաստանի ֆուտբոլի ֆեդերացիայի նախագահը կրթահամալիրում եւս մեկ անգամ նշեց, որ ՀՖՖ-ի քաղաքականության առաջնահերթությունների մեջ է մանկապատանեկան ֆուտբոլի եւ դրան նպաստող ենթակառուցվածքների զարգացումը եւ որ անցած մի քանի տարիների ընթացքում Հայաստանի ֆուտբոլի ֆեդերացիան Երեւանում, Հայաստանի մարզերում եւ Լեռնային Ղարաբաղում արհեստական խոտածածկով ավելի քան 100 խաղադաշտ է կառուցել, տեղեկացնում է ՀՖՖ-ի պաշտոնական կայքը: