Երկրապահը վաստակել է այդ իրավունքը, որ ազգային տոնացույցում իր օրն ունենա. Մանվել Գրիգորյան

Մայիսի 8-ը Երկրապահի օրն է: Տոնի նախօրեին հարցազրույց ենք ունեցել ԵԿՄ վարչության նախագահ, Արցախի հերոս Մանվել Գրիգորյանի հետ:

- Պարո՛ն Գրիգորյան, ի՞նչ օր է Ձեզ համար մայիսի 8-ը:

- Ոչ միայն ինձ համար, ես կարծում եմ՝ ողջ հայ ազգի համար երկրապահի օրը պետք է ամենակարևոր տոներից լինի: Երկրապահը վաստակել է այդ իրավունքը, որ ազգային տոնացույցում իր օրն ունենա: Այդ իրավունքը մենք վաստակել ենք մեր սպարապետ Վազգեն Սարգսյանի գլխավորությամբ, մեր քաջ տղաների արիության, հերոսական ու հաղթական պայքարի շնորհիվ: Ես, օգտվելով առիթից, մեր ժողովրդին շնորհավորեմ մայիսյան տոների կապակցությամբ: Մայիսի 8-9-ը մեր ազգի ամենակարևոր ամսաթվերից են: Սա մեծ քառատոն է՝ երկրապահի օր, ֆաշիզմի նկատմամբ առաջադեմ մարդկության տարած հաղթանակի օր, Շուշիի ազատագրման օր և ԼՂՀ պաշտպանական բանակի ստեղծման օր: Մայիսը մեր ազգային տոնացույցի ամենահարուստ ամիսն է: Այս ամսին էին նաև 1918-ի հերոսամարտերը, որոնց շնորհիվ Հայաստան պետություն կազմավորվեց: Ես մայիսյան բոլոր տոների կապակցությամբ շնորհավորում եմ աշխարհասփյուռ հայությանը, Արցախի հերոսական ժողովրդին, հերոսներ ծնած մեր հերոս մայրերին, սպարապետին ու մեր մյուս նահատակ ընկերներին:

Շնորհավորում եմ մեր երկրապահ բանակին՝ հրամանատարներից, նախարարից, գերագույն գլխավոր հրամանատարից մինչև սահմանին կանգնած շարքային զինվոր, որ այսօր մեր խաղաղ կյանքն է երաշխավորում: Չմոռանանք հին ու նոր սերունդներին՝ շնորհավորում եմ Հայրենական մեծ պատերազմի վետերաններին ու մեր պատանի և երիտասարդ երկրապահներին: Ասեմ, որ տարին հոբելյանական է: Երկրապահ կամավորականների միության 20-ամյակն ենք տոնելու: Երկրապահը փաստացի գործում էր 1989-ից, բայց հիմնադիր համագումար արեց, կառույցի տեսք ստացավ 1993-ի հուլիսին: Ընթացող թեժ պատերազմի ժամանակ սպարապետ Վազգեն Սարգսյանն զգաց, որ ԵԿՄ-ի հիմնումն անհրաժեշտություն է:

- Թե որն էր երկրապահի դերը պատերազմի ժամանակ, բոլորին է հասկանալի, իսկ այսօր ինչո՞վ է զբաղված երկրապահը:

- Չմոռանանք, թե ինչ տարածաշրջանում ենք ապրում: Չմոռանանք, որ խաղաղության մեծ համաձայնագիր էլ դեռ չունենք, այլ շատ փխրուն հրադադարի վիճակում ենք, որի պայմաններն ավելի ու ավելի հաճախ է խախտում մեր հակառակորդը: Երկրապահն այսօր զոհվածների, վիրավոր ու հաշմանդամ ազատամարտիկների սոցիալական, իրավական խնդիրներին հետամուտ լինելուց զատ նաև շարունակում է բանակի ռեզերվ մնալ: Մենք ունենք «Պատանի երկրապահ» և «Երիտասարդ երկրապահ» ստորաբաժանումներ, որոնց միջոցով նոր սերունդին ռազմահայրենասիրական դաստիարակություն ենք երաշխավորում: Մեր այս կառույցների բովով անցածները հիանալի տիրապետում են զենքի, մարտարվեստի, հայոց պատմությանը, փայլուն գիտեն հայրենիքի ամեն մի անկյունը: Նրանք մեր բանակի լավագույն զինվորներ են դառնում: Քանի դեռ Արցախի հայկական պետությունը պաշտոնապես չի ճանաչվել ողջ աշխարհի, նաև՝ Ադրբեջանի կողմից, մենք պետք է չափազանց զգույշ լինենք: Զգոն պետք է լինենք դրանից հետո էլ:

- Կարծում եք ԼՂՀ-ն միջազգայնորեն կճանաչվի՞: Իսկ ի՞նչ ճակատագիր եք կանխատեսում ազատագրված տարածքների համար:

- Տարածքների մասին խոսելն ավելորդ է: Դրանք Հայաստանի, Արցախի անվտանգության միակ իրական երաշխիքն են: Մենք խաղաղասեր ենք: Մենք քրիտոնյա ենք, պատերազմ չենք ուզում, արյուն չենք ուզում: Միայն մեր բնական հայրենիքի այս փոքրիկ հատվածն ազատագրելով է, որ կարողացանք խաղաղություն պարտադրել մեզ պատերազմ պարտադրած արյունատենչ թուրք ազերուն: Այս տարածքների ամեն մի ծառի, թփի, քարի տակ մեր ընկերների' մեզ համար շատ թանկ, անգին արյունն ու քրտինքն է: Հիմա այդ տարածքները հանձնենք, որպեսզի թուրքը դարձյալ դիրքային առավելություն ստանա և լայնամասշտաբ պատերա՞զմ սկսի: Ոչ: Մենք այդ տարածքները հանուն խաղաղության ենք ազատագրել և հանուն խաղաղության էլ պահելու ենք հայկական, դեռ մտածելու ենք տարածքներն արդյունավետ իրացնելու, բնակեցնելու, տնտեսական կոմունիկացիաներ աշխատեցնելու մասին: Կրկնեմ շատ անգամներ ասածս՝ կարևոր է ոչ միայն ձեռք բերելը, այլև՝ ձեռք բերածը պահելը, պահպանելն ու նոր սերունդին փոխանցելը: Ինչ վերաբերում է Արցախի պետության ճանաչմանը, ապա աշխարհն, ուզած-չուզած, գալու է այդ որոշման: Թեկուզ դանդաղ, բայց պրոցեսը կա: Մի ամիս առաջ ԱՄՆ-ի Մեն նահանգը պաշտոնապես ճանաչեց ԼՂՀ-ն: Դա ԱՄՆ արդեն երրորդ նահանգն էր, որ նման վճիռ կայացրեց: Մոտ 15 օր առաջ ԼՂՀ անկախությունը ճանաչող որոշում ընդունեց նաև Ֆրեզնոյի շրջանային խորհուրդը: Բոլորն էլ հասկանում են, որ Արցախն անկախ պետություն լինելու շատ ավելի իրավունք, իրավական հիմնավորումներ ունի, քան նույնիսկ Կոսովոն: Մեր համառությունը դրական արդյունքի է բերելու: Աշխարհն սկսում է հաշվի նստել արցախցու արդար պահանջի հետ, քանի որ տեսնում է համառություն, անկոտրում կամք: Նույն կերպ մեր մեծ պահանջատիրությունն է մի օր պտուղներ տալու: Երկու տարուց հայոց Եղեռնի 100-ամյակն է: Ես հավատացած եմ, որ աշխարհը, այդ թվում' Թուրքիան, ճանաչելու են ցեղասպանության փաստն, ու մեր պահանջատիրությունը միջազգային ատյաններում քննարկվելու է: Մի բան էլ ասեմ: Որքան համախմբված, միասնական լինենք, այնքան շուտ կհասնենք մեր ազգային նպատակներին: Միասնականությունն ամենաանհրաժեշտն է մեր ազգին: Ես այս գեղեցիկ մայիսյան տոների առիթով հայ ազգին համախմբում, միասնականություն եմ մաղթում:

- Իսկ ինչպե՞ս եք գնահատում Երևանի ավագանու ավարտված ընտրությունները:

- Ընտրությունն անցավ շատ բարձր մակարդակով: Երկրապահն էլ ակտիվորեն ներգրավված էր պրոցեսում, քանի որ ՀՀԿ ցուցակը գլխավորում էր ԵԿՄ վարչության անդամ Տարոն Մարգարյանը, ՀՀԿ ցուցակում կային տասնյակ երկրապահներ: Ես շնորհավորում եմ բոլոր այն քաղաքական ուժերին, որոնք կարողացան ստանալ երևանցու վստահության քվեն և ներկայություն ունենալ ավագանիում: Բնական է, որ առանձնահատուկ շնորհավորում եմ ՀՀ նախագահ Սերժ Սարգսյանին և ընտրություններում ՀՀԿ ցուցակի առաջատար, գործող քաղաքապետ Տարոն Մարգարյանին' ընտրողների ձայների մեծամասնությունն ստանալու կապակցությամբ: Ընտրությունների արդյունքները կանխորոշում են, որ Երևանը կշարունակի գլխավորել երկրապահ Տարոն Մարգարյանը, ավագանիում կլինեն ՀՀԿ ցուցակով անցած երկրապահներ, երկրապահներից մի քանիսն էլ կպաշտոնավարեն Երևանի կառավարման գործադիր համակարգում: Մենք գոհ ենք ընտրության թե ընթացքից, թե արդյունքներից:

Շնորհավորում եմ բոլոր երևանցիներին, հայ ժողովրդին: