Արմո. «Ուզում եմ ամուսնանալ»

Երբ հարսանիքի մասին ենք խոսում, բոլորս պատկերացնում են հայակական-ավանդական արարողություն: Երիտասարդ երգիչ Արմոն իր «Հարսանիք է լինելու» երգի տեսահոլովակով կարծես կոտրեց այդ կարծրատիպը՝ միանգամայն տարբերվելով նրանցից, ովքեր այդպիսի տեսահալովակ վաղուց են նկարահանել: Նրա տեսահոլովակում դարձյալ հարսանիք է, բայց ոչ ավանդական, այլ խելառ և գժոտ. այս դեպքում այդ խելառ դեմքը հարսն է, ով, ըստ ավանդույթի, պետք է ամաչկոտ և հեզ լինի, բայց տեսահոլովակում ճիշտ հակառակն է: Մեր այս հարցազրույցը երգչի տեսահոլովակային և իրական՝ ապագա հարսանիքի մասին է:

- Նախ՝ ո՞վ է տեսահոլովակի հերոսուհին:
- Ասեմ, որ հերոսուհուն՝ Թամարիկին, ընտրել ենք վերջին մի քանի օրվա ընթացքում: Նրան ընտրել է տեսահոլովակի ռեժիսոր Մայիս Հայրապետյանը: Երբ նկարներով տեսա, այնքան էլ չհավանեցի, որովհետև նրան ավելի գեղեցիկ էի պատկերացնում: Հետագայում՝ նկարահանումների ժամանակ հասկացա, որ նա իր խաղով և բնույթով շատ ավելի լավն է: Իսկ երբ տեսահոլովակն ամբողջությամբ պատրաստ էր, ևս մեկ անգամ համոզվեցի, որ նա կարծես հատուկ այդ դերի համար էր՝ չնայած դերասանական կրթություն չունի:

- Այս տեսահոլովակդ միանգամայն տարբերվում է նախորդներից և, ընդհանրապես, հայկական մյուս տեսահոլովակներից. մտահղացումը քո՞նն էր:
- Մտահղացումը ռեժիսորինն ու իմն էր. ընդհանուր գաղափարը ծնվել է մոտ տասը րոպեի ընթացքում:

- Մինչ տեսահոլովակը դիտելը՝ շատերը կարծում էին, թե այդ երգը Նարեկ Բավեյանը կամ Արամեն է կատարում: Ի՞նչ ես կարծում, ինչո՞վ է դա պայմանավորված. գուցե այժմ շա՞տ են միանման երգերը:
- Այո, այդպիսի կարծիքներ ես էլ եմ լսել: Չգիտեմ՝ ինչո՞վ է դա պայմանավորված, բայց իմ ձայնի մեջ կոպտությունն ավելի շատ է: Այժմ զբաղվում եմ վոկալով ու շատ լավ արդյունք ունեմ: Կան նաև երգեր, որոնցում վոկալս ամբողջությամբ զգացվում է. գուցե նույնիսկ մարդիկ կլինեն, ովքեր չեն հավատա, որ ես եմ երգողը: Կարծում եմ՝ «Հարսանիք է լինելուն» յուրահատուկ է իր գործիքավորմամբ, նաև այս երգում ռոքային ինչ-որ բան կա:

- Մի առիթով ասել ես, որ անցած տարի լավ չես աշխատել: Եթե այդպես շարունակես աշխատել, հե՞շտ կլինի պահպանել դիրքերը շոու-բիզնեսում:
- Հա, էս տարի շատ ծանրաբեռնված եմ. արդեն մի քանի ամիս է անցել, բայց այդ ծանրաբեռնվածությունը զգում եմ: Չէ, դիրքերը պահպանելը հաստատ հեշտ չէ. երբ ընդմիջումը երկար է, մարդիկ սկսում են որոշ չափով մոռանալ:

- Իսկ ինչո՞վ էր պայմանավորված այդ ընդմիջումը:
- Կարելի է ասել՝ իմ թամբալությամբ. ուզում էի հանգստանալ: Թիֆլիսում և Հայաստանում շատ լավ հանգստացա և արդեն պատրաստ եմ նոր թափով աշխատելու:

- Ո՞վ է ֆինանսավորում քեզ. գուցե այլ աշխատանք ունե՞ս:
- Այժմ այլ աշխատանք չունեմ: Երգարվեստում արդեն հունի մեջ եմ ընկել ու աշխատածս գումարները կարողանում եմ ներդնել նոր գործերի՝ ստեղծագործությունների մեջ: Գումար հիմնականում համերգներից եմ աշխատում. այժմ հրավեր ունեմ նաև Ավստրալիայից. մայիսի վերջին այնտեղ պարահանդես է կազմակերպվելու, որի ժամանակ կերգեմ ես ու, հավանաբար, Գոհար Հովհաննիսյանը:

- Ժամանակին ակումբում էիր աշխատում. դա չի՞ հյուծում երգչին:
- Անպայման: Կոպիտ ասած՝ ակումբում երգելով լճանում ես: Նախ այն ազդում է երգչի հեղինակության վրա, այնուհետև՝ մի տեսակ հասանելի ես դառնում: Ակումբը նաև շատ ժամանակ է խլում, խախտում է մարդու ռեժիմը, ինչը վնասակար է առողջությանը: Ակումբում աշխատելը, իհարկե, ունի նաև լավ կողմեր՝ շփումը և բեմի վրա ավելի ազատ շարժվելը:

- Այս տարի նոր, գլամուրային ֆոտոսեսիայով նաև վերսկսեցիր: Չե՞ս կարծում, որ դրանք մի փոքր շինծու են և, հնարավոր է՝ վանեն երկրպագուներիդ:
- Բան չունեմ ասելու, լուսանկարներում այդպիսի բան կա: Բայց փորձել ենք միօրինակությունից դուրս գալ և նոր բան մատուցել: Հաճախ տարբեր կատարողների լուսանկարները նույն աթոռի վրա նստած են արվում, ինչը շատ տարածված է: Չգիտեմ, չեմ կարող ասել՝ դա կվանի՞ երկրպագուներիս, թե՞ ոչ:

- Գիտեմ, որ նաև երգեր էիր գրում. այժմ շարունակո՞ւմ ես ստեղծագործել. դրանք կրկին սիրո՞ մասին են:
- Այո՛, շարունակում եմ ստեղծագործել: Երկու նոր երգ ունեմ, որոնք դարձյալ տարբերվում են նախորդներից: Դրանցից մեկն արդեն պատրաստ է, այն կոչվում է «Լավն ա» (լրագրողիս հարցին արդյոք այդպես խոսակցական տարբերակով՝ «ա»-ով է լինելու, հանգիստ պատասխանեց՝ հա): Գրում եմ այն, ինչ զգում եմ. դրանք հիմնականում րոպեների ընթացքում են ծնվում և համապատասխանում են իրականությանը:

- Տեսահոլովակում ամուսնանում ես, իրական կյանքում ե՞րբ ես պատրաստվում ամուսնանալ:
- Շատ եմ ուզում այս տարի ամուսնանալ: Կարելի է ասել՝ այժմ ուղեղս ավելի շատ այդ ուղղությամբ է աշխատում: Այս տարի եթե չամուսնանամ էլ, ապա պետք է անպայման նշանվեմ, բայց դեռ հարմար թեկնածու չունեմ:

«Ե՞ս Yes!» ամսագիր, արխիվ, մայիս 2011