Սեմինարներ՝ աշակերտական խորհուրդների անդամների համար

Հայաստանի երիտասարդական հիմնադրամը սերտորեն համագործակցում է ինչպես ուսանողական, այնպես էլ աշակերտական խորհուրդների հետ, տարբեր ծրագրերով նպաստում այդ կառույցների հզորացմանը։ Ապրիլի 27-ից մայիսի 4-ը Հայաստանի երիտասարդական հիմնադրամն իրականացրեց «Աշակերտական խորհուրդս և ես» խորագրով սեմինար-քննարկման առաջին փուլը: Միջոցառմանը մասնակցեցին Երևանի 20 ավագ դպրոցների աշակերտական խորհուրդների ներկայացուցիչներ:

«Աշակերտական խորհուրդս և ես» ծրագրի հիմնական նպատակը ՀՀ ավագ դպրոցներում աշակերտական ինքնավարության ինստիտուտի զարգացումն և կատարելագործումն Է:

Սեմինարի ընթացքում քննարկվեցին դպրոցի աշակերտական ինքնավարության մարմինների կառուցվածքը, գործառույթները։ Աշակերտական խորհրդի անդամները ծանոթացան նաև ՀՀ օրենսդրական դաշտին։

Թիվ 105 ավագ դպրոցի աշակերտական խորհրդի նախագահ Էրիկ Վարդանյանն այդ կառույցին անդամակցում է 4-րդ դասարանից։ Էրիկը նշում է, որ աշակերտական խորհուրդն անդրադառնում է ամենատարբեր խնդիրների՝ անկարգապահ աշակերտների վարքից մինչև, սովորողների իրավունքների պաշտպանություն։ Էրիկը նշում է նաև, որ թիվ 105 ավագ դպրոցի աշակերտական խորհուրդը բավականին համախմբված է, այն իրենից մեծ ուժ է ներկայացնում, և շատ դեպքերում ուսուցիչներն էլ դիմում են իրենց՝ որոշակի հարցեր լուծելու համար։

Թիվ 30 ավագ դպրոցի աշակերտական խորհրդի նախագահ Հակոբ Պարսամյանը կարևորում է դպրոցներում աշակերտական խորհուրդների ձևավորումը։ Հակոբը նշում է, որ այդ խորհուրդներին անդամակցումը հնարավորություն է տալիս հաղորդակցվել դպրոցի կառավարմանը, կարողանում են իրենց մտքերը, ծրագրերը, առաջարկները ներկայացնել տնօրինությանը, լուծում տալ իրենց մտահոգող խնդիրներին. «Աշակերտական խորհրդի միջոցով մենք ընդգրկվում ենք դպրոցում կատարվող աշխատանքների մեջ։ Աշակերտական խորհուրդները մի օղակ են, որի շրջանակներում կարողանում ենք համախմբված թիմ ստեղծել ու հասնել մեր խնդիրների լուծմանը»։ Հակոբը նշում է նաև, որ աշակերտական ինքնակառավարման մարմնի անդամները մասնակցում են մանկավարժական խորհրդի նիստերին և ներկայացնում իրենց խնդիրներն ու առաջարկները։

Նշենք, որ աշակերտական խորհուրդն աշակերտական ինքնավարության և ինքնակառավարման լիազորություններով օժտված ներկայացուցչական մարմին է: Այն ստեղծվում է դպրոցի գործունեության կազմակերպմանը նպաստելու, անմիջականորեն իրենց վերաբերող հարցերի մասին աշակերտների կարծիքի ազատ արտահայտումն ապահովելու և սովորողների իրավունքների ու պարտականությունների վերաբերյալ դպրոցի կանոնադրության դրույթների պահպանումը վերահսկելու նպատակով: