Սեյրան Օհանյանը չհերքեց, որ ՀՔԾ նախկին պետի պաշտոնանկությունը կապ ունի զինվորի մահվան գործի հետ (տեսանյութ)

ՀՀԿ ԳՄ և խորհրդի նիստերից հետո պաշտպանության նախարար Սեյրան Օհանյանը լրագրողների հետ զրույցում, խոսելով կառավարության կազմի փոփոխության մասին, կարծիք հայտնեց, որ այն քաղաքական ուժը, որն այսօր հասել է հաջողության և ունի որոշակի կշիռ, փոփոխությունների իրականացման ճիշտ որոշում է ընդունել:

Լրագրողները Սեյրան Օհանյանից հետաքրքրվեցին նաև ՀՔԾ նախկին պետ Անդրանիկ Միրզոյանին աշխատանքից ազատելու պատճառի մասին, ով նշեց, որ որոշակի չափով տեղեկացված է, սակայն այս պահին չի ցանկանում մանրակրկիտ անդրադառնալ դրան, պատճառաբանեց, որ կարող է սխալված լինել: 

Դիտարկմանը, թե իրականությանը մոտ է այն վարկածը, ըստ որի՝ Անդրանիկ Միրզոյանի պաշտոնանկությունն առնչություն ունի զինծառայողի մահվան հետ, Օհանյանն ասաց. «Ասում են»:

Անդրադառնալով Սերժ Սարգսյանի կողմից կառավարությունում արված հայտնի խորհրդակցությանը, որի ժամանակ նախագահը դժգոհեց կառավարության աշխատանքից, Սեյրան Օհանյանն ասաց.

«Ընդհանուր առմամբ՝ աշխատանքային պրոցեսի մեջ խորհրդակցությունները, տարբեր կազմակերպչական միջոցառումները, որոնք ուղորդող նպատակ ունեն, օրինակ, տրամադրել մարդկանց, ուղղություն տալ, նշել լավ կողմերը, նշել այն թերությունները, որոնք աշխատանքի ընթացքում լինում են, զգուշացնել մեկ կամ երկու անգամ, չէ՞ որ մարդիկ իրենց գործի մեջ նաև սխալվում են։ Կարծում եմ, որ անհրաժեշտություն է, և երկրի ղեկավարը, հանրապետության նախագահը այդպիսի խորհրդակցություններ ոչ մեկ անգամ է անցկացնում տարբեր ոլորտներում, տարբեր գերատեսչություններում, նաև մեր գերատեսչությունում՝ մեզ վերաբերող մասով, քանի որ մեր ոլորտին շատ ծանոթ է. սրա մեջ ոչ մի արտառոց բան չպետք է տեսնենք»։

Մանրամասն՝ տեսանյութում.