Գոլս նվիրում եմ հորս հիշատակին. Տարոն Ոսկանյան

Հայաստանի գավաթի եզրափակչում «Շիրակի» նկատմամբ տոնած հաղթանակից հետո «Փյունիկի» պաշտպան Տարոն Ոսկանյանյանի  հեղինակած միակ գնդակը հաղթանակ բերեց իր թիմին գավաթի խաղարկությունում: Լարված մրցավեճից հետո պաշտպանը զրուցեց ակումբի պաշտոնական կայքի հետ:

Այն հարցին, թե արդյոք իրեն հերոս զգում է, Տարոնը պատասխանեց.

-Հերոս ինձ զգում եմ միայն խաղընկերներիս հետ միասին, մեր ամբողջ թիմին եմ հերոս համարում, որ կարողացանք այսպիսի բարդ մրցակցի հետ խաղում դրական արդյունքի հասնել ու նվաճել գավաթը:

-«Փյունիկի» այս սերնդի համար սա առաջին տիտղոսն էր…

-Այո՛, ներկայիս կազմից շատ քիչ ֆուտբոլիստներ էին նվաճել գավաթը: Դա մեզ լրացուցիչ շարժառիթ էր տալիս, որ ամեն ինչ անենք հաղթանակի հասնելու համար: Կարծում եմ՝ այս տիտղոսը լրացուցիչ վստահություն կհաղորդի մեր տղաներին մյուս խաղերում ավելի լավ հանդես գալու համար: Այս հաղթանակը մեր հիշողության մեջ կմնա ամբողջ կյանքում, քանի որ առաջինն էր մեզ համար:

-Կարելի՞ է ասել՝ ռևանշի ձգտումը լրացուցիչ մոտիվացիա էր:

-Առաջնության խաղում մենք զիջել էինք գյումրեցիներին ու ցանկանում էինք ռևանշի հասնել: Գիտեինք, որ շատ դժվար է լինելու: Կարծում եմ՝ «Շիրակը» ներկայումս մեր երկրի ամենաուժեղ թիմն է իր կազմով: Շատ ուրախ եմ, որ հաղթեցինք և ռևանշի հասանք:

-Նորից ստանդարտ դիրք, ու ամենաարագը դու կողմնորոշվեցիր:

-Ստանդարտ խաղարկումների ժամանակ մենք նույնպես միանում ենք գրոհներին: Այս անգամ շատ լավ դիրքում ստացա գնդակը և մնում էր միայն գրավել դարպասը: Ուզում եմ գոլս նվիրել հորս հիշատակին, ով անժամանակ հեռացել է կյանքից: Վստահ եմ՝ նա միշտ իմ կողքին է և տեսնում է ինձ վերևից: Ամենաշատը նա կուրախանար իմ այս հաջողությամբ: