Մխիթարյանը հավասարը չունի Ուկրաինայի առաջնությունում, սակայն Իսպանիան նրան ավելի է համապատասխանում. Գեցկո

Ուկրաինայի հավաքականի նախկին հարձակվող Իվան Գեցկոն անդրադարձլ է «Շախտյորի» առաջատար Հենրիկ Մխիթարյանին և նշել, որ նրա համար կարիերան շարունակելու լավագույն տարբերակը Իսպանիայի առաջնությունն է:

«Մխիթարյանն ունակ է խաղալ ցանկացած դիրքում՝ եզրային և կենտրոնական կիսապաշտպանի, հարձակվողի դիրքում: Անընդհատ շարժման մեջ է, ազատ տարածություններ է փնտրում, կարողանում է մեկ հպմամբ աշխատել գնդակի հետ, հիանալի է համագործակցում  բրազիլացիների հետ, ունի բարձր արագություն: Սակայն նրա համար դժվար է խաղալ երկրորդ հարկում: 2010-ի ամռանը «Շախտյորը» Մխիթարյանի համար վճարեց 7.5 մլն դոլար: Կարծում եմ՝ այս ընթացքում նրա տրանսֆերային արժեքը բարձրացել է առնվազն երեք անգամ:  Այժմ Հենրիկը հավասարը չունի Ուկրաինայի առաջնությունում: Մխիթարյանի տրանսֆերը պոտենցիալ ձեռքբերողը պետք է կատարի 20 մլն դոլարի ներդրում: Սակայն ֆուտբոլիստին խորհուրդ կտայի եկող մրցաշրջանը անցկացնել «Շախտյորում», իսկ 2014-ի ամռանը տեղափոխվել արևմտաեվրոպական որևէ ակումբ: Այդ ժամանակ նա կլինի 25 տարեկան, ինչն արմատապես փոխում է աշխատանքի պայմանները: Համոզված եմ՝ Հենրիկը կարող է խաղալ ցանկացած առաջնությունում՝ Անգլիայում, Իտալիայում, Գերմանիայում: Սակայն կարծում եմ՝ նրան ամենաշատը համապատասխանում է Իսպանիայի առաջնությունը»,-Գեցկոյի խոսքերը մեջբերում է gazeta.ua-ն։