ՀՀ և ԱՄԷ Վերահսկիչ պալատների միջև համաձայնագիր է ստորագրվել

ՀՀ և ԱՄԷ Վերահսկիչ պալատների միջև ստորագրվել է համագործակցության համաձայնագիր: Այն նախատեսում է փորձի փոխանակում, օրենսդրական դաշտի բարելավում պետական վերահսկողության մեթոդաբանության և ընթացակարգերի մշակման, համատեղ և զուգահեռ վերահսկողության ոլորտներում և այլն:

ՎՊ նախագահ Իշխան Զաքարյանը նշել է, որ համաձայնագիրը երկու երկրների միջև ստորագրված առաջին լուրջ փաստաթուղթն է և համագործակցության խորացման նոր խթան կհանդիսանա Հայաստանի և Արաբական Միացյալ Էմիրությունների միջև: «Մենք ակտիվորեն համագործակցում ենք մեր գործընկերների հետ, ինչի արդյունքում Հայաստանի Վերահսկիչ պալատը գործակցության համաձայնագրեր է կնքել բազմաթիվ գործընկեր կառույցների հետ: Ակտիվորեն համագործակցում ենք Հոլանդիայի, Գերմանիայի, Ֆրանսիայի և ԱՊՀ երկրների Վերահսկիչ պալատների հետ: Այսօր այդ ցանկին միացավ նաև Արաբական Միացյալ Էմիրությունները, ինչը շատ կարևոր է՝ հաշվի առնելով, որ վերջին տարիներին զարգանում են տնտեսական և առևտրային կապերը մեր երկրների միջև»,-ասել է ՀՀ ՎՊ նախագահը:

Ի. Զաքարյանը նշել է նաև, որ այս տարի Հայաստանի Վերահսկիչ պալատն իրականացնում է օպերատիվ վերահսկողություն՝ շեշտը դնելով հատկապես պետական գնումների և շինարարության ոլորտների վրա: ԱՄԷ Վերահսկիչ պալատը բավական մեծ փորձ ունի այս ոլորտում, և նրանց հետ համագործակցությունը այդ առումով կարևոր է:

ԱՄԷ ՎՊ նախագահ Հարիբ ալ Ամիմին շնորհակալություն է հայտնել հրավերի համար և նշել է, որ երկու երկրների միջև համագործակցության լուրջ ուղիներ է տեսնում: «Մենք համոզված ենք, որ տեղեկատվական տեխնոլոգիաների, բյուջետային ծախսերի և կոռուպցիայի նկատմամբ վերահսկողության մեր փորձը մեծապես կօգնի Հայաստանին»,-ասել է Ամիմին, ավելացնելով, որ ամեն ինչ անելու են երկու երկրների միջև ապրանքաշրջանառությունը խթանելու համար:

ՀՀ ՎՊ լրատվական ծառայություն