Հայ ժողովրդին պատմական հայրենիքից հայաթափելու փորձը, ցավոք, մտավ առավել ակտիվ փուլ. Զարուհի Փոստանջյան

«Ժառանգություն» խմբակցության պատգամավոր Զարուհի Փոստանջյանի հայտարարությունը Հ1 հեռուստաընկերության «Խորհրդարանական շաբաթ» հաղորդման շրջանակում.

2008 թվականից Սերժ Սարգսյանի գլխավորությամբ հայ ժողովրդին պատմական հայրենիքից հայաթափելու փորձը, ցավոք, մտավ առավել ակտիվ փուլ: Պաշտոնական տվյալների համաձայն' Սերժ Սարգսյանի հակահայկական, հակամարդկային և ապաշնորհ քաղաքականության գործադրման հետևանքով վերջին հինգ տարիների ընթացքում արձանագրվել է՝

Արտագաղթ ' 200 հազարից ավելի մարդ, ինչը նշանակում է դատարկ գյուղեր, փակ դռներ, առաջին դասարան գնացող երեխաների բացակայություն և այլն,

Նվազագույն աշխատավարձ, կենսաթոշակ' 35 հազար դրամ, ինչը նշանակում է արժանապատվության ստորացում,

Աղքատություն' 36 տոկոս, ինչը նշանակում է մեկ միլիոնից ավելի քաղցած մարդ,

Ստվերային տնտեսություն' 39 տոկոս, ինչը նշանակում է միլիարդների հասնող դոլարների գողություն հայ ժողովրդից:

Այս խայտառակ ցանկը շարունակելի է: Խայտառակ վիճակի գլխավոր կազմակերպիչներից մեկը գործում է բացահայտ՝ գործի դնելով հանցագործի և ահաբեկչի մտքին հասու բոլոր միջոցները: Այնուամենայնիվ՝ 2013 թվականին տեղի ունեցած ընտրությունները, որոնք, ըստ էության, մարտական գործողություն էին, անհանգստություն և վախի զգացում հարուցեցին Սերժ Սարգսյանի մոտ: Նրա կողմից կազմակերպված հանցավոր խմբի և համակարգի նկատմամբ հայ հասարակության հոծ բանակը ակնհայտ, առանց վախի դրսևորում է անհնազանդություն: Մերժում է գործող համակարգի առկայությունը և գործող համակարգի ղեկավարներին ճանաչում է որպես երկար տարիների փորձ ունեցող հանցագործների:
Սերժ Սարգսյանը, լինելով խորհրդային մտայնության և չեկիստական դպրոցի հետևորդ, չգիտակցելով ժամանակի զգացումը և ընդվզող հասարակության պահանջը, մնացել է Խորհրդային Միության փլատակների վրա ձեւավորված ավտորիտար ճահճում:

Ընդվզող հասարակության հսկայական բանակը իրեն պատկերացնում է լճացված ճահճից դուրս: Ըդվզող հասարակությունը ձևակերպել է իր թե´ հեռավոր, թե´ առաջնային նպատակը: Ճահճում գտնվողները ունեն մեկ ցանկություն՝ հնարավորինս երկարացնել իրենց կյանքը ճահճի մեջ, թույլ չտալ, որ հայ ժողովրդը չորացնի այդ գարշելի, նեխած ճահիճը:
Ընդվզող հասարակության ներկայացուցիչներս առավել սթափ ենք և զգոն, հիասթափությունը մեր կողմից մերժվում է:

Սիրելի հայրենակիցներ,

Մեր ճնշումները գործող արատավոր համակարգի վրա ակնհայտ փաստ են, Երևանի ավագանու ընտրությունների մարտական գործողությանը մասնակցած քաղաքական և քաղաքացիական ընդդիմադիր ուժերը ստացան ընդվզող քաղաքացիների պատկառելի ձայները:

«Բարև Երևան» վերկուսակցական դաշինքը, ներկայացված լինելով Երևանի ավագանիում, խոսափողն է լինելու բոլոր ընդվզող քաղաքացիների համար և, համագործակցելով նրանց հետ, կյանքի է կոչելու Նոր Հայաստան շարժման ծրագիրը:

Ընդվզող աբստամբ հայ ժողովուրդ մաղթում եմ մեզ բարի աշխատանք: