Հայաստանի մշակույթի օրերը՝ Բելառուսում

Ս. թ. մայիսի 1-5-ը Բելառուսի Հանրապետությունում անցկացվել է Հայաստանի մշակույթի օրեր, որի հանդիսավոր բացումը կայացել է Բելառուսի պետական ֆիլհարմոնիայում՝ Հայաստանի պարարվեստի «Բարե­կա­մու­թյուն» անսամբլի մենահամերգով: Ողջույնի խոսքով հանդես են եկել ՀՀ մշակույթի նախարարի տեղակալ Արթուր Պողոսյանը և Բելառուսի մշակույթի նա­խարարի առաջին տեղակալ Վլադիմիր Կա­րաչևսկին: Հայաստանի մշակույթի օրերի բացմանը ներկա էին Բելառուսի մշակույթի նախարար Բորիս Սվետ­լովը, Բելառուսում հավատարմագրված դիվանագետներ, պաշտո­նա­տար անձինք, հայ համայնքի ներկայացուցիչներ: «Բա­րեկամություն» անսամբլի ելույթն արժանացել է ջերմ ընդունելության և բարձր գնահատականի:

Մայիսի 2-ին, Կինոյի տանը «Եթե բոլորը» ֆիլմի ցուցադրությամբ կայացել է հայկական կինոյի օրերի բացումը, իսկ Հանրա­պե­տու­թյան պալատի մշակույթի և արվեստի համալսարանի պատկերասրահում բացվել է երիտասարդ նկարչուհի Արևիկ Պետրոսյանի աշխա­տանք­ների ցուցահանդեսը:

Մայիսի 3-ին, Հայաստանի պարարվեստի «Բարեկամու­թյուն» անսամբլը ևս մեկ մենահամերգով ելույթ է ունեցել Մոգիլյով քաղաքում:
Հայաստանի պատվիրակությունը մշակույթի օրերի շրջանակում պաշտոնական հանդիպումներ է ունեցել Բելառուսի մշակույթի նախարար Բորիս Սվետլովի և Բելառուսի մշակույթի նա­խարարի առաջին տեղակալ Վլադիմիր Կա­րաչևսկու հետ, ձեռք են բերվել պայմանավորվածություններ երկկողմ մշակութային համագործակցության հետագա զարգացման ուղղությամբ: Այս համատեքստում մինչև տա­րեվերջ կստորագրվի «Հայաստանի Հանրապետության մշակույթի նախարարության և Բելառուսի Հանրապետության մշակույթի նախարարության միջև 2014-2017 թթ. մշակութային համագործակցության մասին» ծրագիրը, աշխատանքներ կտարվեն Արամ Խաչատրյանի ծննդյան 110-ամյակին նվիրված միջոցառումների շրջանակում՝ Երևանում և Մինսկում «Սպարտակ» բալետի համատեղ ներկայացման, ինչպես նաև երկու երկրներում կազմակերպվող փառատոներին մասնակցության ապահովման ուղղություններով: Պայմանավորվածության համաձայն, «Սլավյանսկի բազար» մրցույթ-փառատոնի ժյուրիի կազմում Հայաստանը կներկայացնի կոմպոզիտորների միության նախագահ Ռո­բերտ Ամիրխանյանը: