Արտաքին գրավչությունը՝ անցագի՞ր

Մենք հաճախ ենք լսում մասնագետների կարծիքները հեռուստատեսության դերի և նշանակության մասին: Ըստ այս դաշտում աշխատող մասնագետների՝ հեռուստատեսությունը մի աշխարհ է, ուր կարող են մուտք գործել միայն նրանք, ովքեր ունեն համապատասխան կրթություն: Ընդ որում՝ միայն կրթությունը քիչ է. դրան պետք է ավելանա նաև նրանց բազմաչարչար աշխատանքային փորձը: Սակայն, երբ արտասահմանյան հայտնի աստղերը սկսեցին վարել ամենատարբեր ժամանցային հաղորդումներ, այդ տենդը շատ արագ հասավ ու վարակեց հայ աստղերին ու քանի որ մեր երկրում այնքան էլ հաճախ չեն կազմակերպվում համերգներ, միջոցառումներ, մեր հայտնիները սկսեցին անգործ մնալ: Հենց այս ժամանակ էր, որ նրանց օգնելու և սնանկացումից փրկելու եկավ հեռուստատեսությունը: Այն աստղերը, ովքեր միայն երգում էին, սկսեցին նկարահանվել սերիալներում, վարել տարբեր հաղորդումներ՝ ձեռք բերելով երկրորդ աշխատանք: Այս մասին գրում է esyes.am-ը:

Հասմիկ Կարապետյանը եկավ բարի լույս ասելու բոլորիս: Չնայած երկար տարիներ մենք սովոր էինք լսել նրա երգը՝ սկսեցինք գրեթե ամեն օր նրան տեսնել եթերում: Այն, որ մեր երգչուհի-հաղորդավարուհին չուներ եթերում աշխատելու փորձ, ակնհայտ էր: Նա «փայլում» էր սխալ խոսքով ու ականջ ծակող ծիծաղով: Սակայն եթերում անցկացրած տարիները անհետք չանցան. այժմ Հասմիկ Կարապետյանը Շանթ հեռուստաընկերության եթերից է մեզ բարի լույս մաղթում՝ ակնհայտ զսպվածությամբ ու ճիշտ, անսխալ խոսքով:

Մեզ քնից արթնացնող հաջորդ հաղորդավարուհին Գայանե Ասլամազյանն է: Թեպետ նա մասնագիտությամբ արվեստաբան է, բայց կարողանում է պատվով տանել իրեն վստահված գործը: Հավանաբար, Գայանեին օգնում են նաև նրա դերասանի, լրագրողի և ռեժիսորի աշխատանքային փորձը: Եվ այսպես, գեղեցիկ արտաքինով, էլ ավելի գեղեցիկ կեցվածքով, երբեմն էլ կարճ շրջազգեստներով Գայանեն բարի լույս է ասում Հայաստանում ապրող և չապրող հայությանը:

Հայկական հեռուստաեթերի իսկական հայտնություն դարձավ ատամնաբույժ Սիմա Բաղդասարյանը, ով նախկինում հեռուստադիտողներին պատմում էր բժշկության մասին: Նրա դեպքում, կարելի է ասել, որ արտաքին գրավչությունը լուրջ դեր խաղաց: Հնարավոր է՝ հեռուստադիտողը երբեմն չցանկանա լսել Սիմային, բայց, հիանալով նրա գեղեցկությամբ, դժվար թե ձեռքն առնի հեռուստավահանակը:
Մնում է հուսալ, որ մեր հեռուստաեթերը զբաղեցնող այս սիրունատես կանանց համար միայն արտաքինն անցագիր չի մնա: Նրանք կաշխատեն իրենց վրա և մեզ կհիացնեն իրենց եթերային էթիկայով, ինտելեկտով ու գրագետ հաղորդավարական խոսքով: