Սեյրան Օհանյան. Շուշիով մենք ցույց տվեցինք հայ ժողովրդի միասնությունը

«Այսօր հայ ժողովրդի համար եռատոն է, որովհետև մայիս ամիսն առանձնահատուկ խորհուրդ ունի մեր տոնացույցի մեջ»։ Այս մասին այսօր Հաղթանակ զբոսայգում լրագրողների հետ ճեպազրույցում ասաց ՀՀ պաշտպանության նախարար Սեյրան Օհանյանը։

Վերջինիս խոսքերով՝ մեր պատմության ընթացքում այս ամսում է, որ ճակատագրի բերումով կամ իրադարձությունների զարգացման ընթացքում ունեցել ենք հաջողություններ, պահպանել ենք մեր ինքնությունը, հավատքը, հաղթանակներ ենք տարել:

«Մեր ծնողների, մեծերի, պապերի՝ նախկինում կատարած սխրագործություններն իրենց արտացոլումն են ստացել հայ ժողովրդի նորօրյա պատմության մեջ։ Մենք կարողացանք ազատագրել հայոց հինավուրց քաղաք Շուշին և դրանով իսկ ստեղծել պաշտպանության բանակը, և նրա կայացումն ու զարգացումը։ Կարող եմ ասել, որ Շուշին մեր Արցախյան գոյապայքարում առանձնահատուկ դերակատարություն ունի, Շուշիով մենք ցույց տվեցինք հայ ժողովրդի միասնությունը, դարերով ռազմական գիտության մոտ կանգնած լինելը: Գիտեք, որ չափազանց դժվար ժամանակներում և պայմաններում ենք միշտ պայքարել և պաշտպանել ինքներս մեզ, ստիպված ենք եղել ռազմական գիտությանը մոտ լինել: Շուշիի օպերացիան ցույց տվեց, թե ինչպիսին է մեր հայ հրամանատարը՝ իր անձնական օրինակով, հայ զինվորը՝ իր նվիրումով, և պատմական առաքելություն մենք իրականացրեցինք»,-ասաց նախարարը։

Սեյրան Օհանյանը կարևորեց նաև Պաշտպանության բանակի և Երկրապահների օրը։ «Մայիսի 9-ը Պաշտպանության բանակի օրն է՝ ըստ տարեկան տոների։ Այն լինում է կազմավորման կամ մարտական հերթապահության ստանձման կամ ի նշանավորումն որևիցե մի խոշոր ճակատամարտի, իսկ Շուշին այդ խոշոր ճակատամարտն է։ Ի վերջո, այդ օրը նաև մեր ԵԿՄ-ի օրն է, որվհետև հայոց պայքարում կամավորական շարժումը, ինքնագիտակցությունը, անձնական նվիրումը շատ մեծ դեր է կատարել»,-ասաց Օհանյանը։