Այսօր բեմադրիչ, դերասան Տիգրան Շամիրխանյանի ծննդյան օրն է

Բեմադրիչ, դերասան Տիգրան Շամիրխանյանը ծնվել է 1899թ. մայիս 10-ին, Շուշիում:

Վաղ հասակից ընտանիքի հետ տեղափոխվել է Բաքու, ապա` Թիֆլիս, որտեղ սովորել է Ներսիսյան դպրոցում: 1921-22թթ. սովորել Է Մոսկվայի հայկական դրամատիկական ստուդիայում:

1934թ. ավարտել Մոսկվայի թատերարվեստի ինստիտուտը:

1923-30թթ. և 1934-43թթ աշխատել Է Երևանի Սունդուկյանի անվան թատրոնում, որտեղ 1937-40թթ. եղել է տնօրենն ու գեղարվեստական ղեկավարը:

1929թ. հիմնել է Երևանի Պատանի հանդիսաեսի թատրոնը, որտեղ իրականացրել է առաջին բեմադրությունը, իսկ 1943թ-ից եղել է թատրոնի գլխավոր ռեժիսորը: Նկարահանվել է «Խաս-Փուշ», «Շորն ու Շորշորը», «Նամուս» ֆիլմերում: 1944-ից դասավանդել է Երևանի գեղարվեստա-թատերական ինստիտուտում: Եղել է պրոֆեսոր:

1949-52թթ. ղեկավարել է Հայկական Թատրոնի ընկերությունը: Դերերից են` Սգանարել` Մոլիերի «Դոն ժուան», Գիքո` Սունդուկյանի «Պեպո», բեմադրություններից են` Սմիռնովի «Պայթյուն» (1929թ.), Յուժին-Սումբատովի «Դավաճանություն» (1941թ.), Գուլակյանի «Ցասում» (1942թ.), Պուշկինի «Քարե հյուր», Շեքսպիրի «Ամառային գիշերվա երազը» (1944թ.), Ղափլանյանի «Ուսուցիչը» (1950թ.) և այլն: 1934թ. արժանացել է ՀԽՍՀ արվեստի վաստակավոր արտիստի, 1949թ.` ժողովրդական արտիստի կոչմանը:

Մահացել է 1952թ. օգոստոսի 29-ին Սոչիում, թաղված է Երևանում: