Ի՞նչ անակնկալ է սպասվում այսօր դերասանուհի Նելլի Խերանյանին

Այսօր գեղեցկուհի դերասանուհի Նելլի Խերանյանի ծննդյան օրն է: Դերասանուհու ճշգրիտ տարիքը գուշակել անհնար է, թեև արտաքին տեսքից դատելով կարելի է սահմանել քսանից-երեսուն: ArmStar.am- հետ զրույցի ընթացքում դերասանուհին փակագծերը չբացելով ծիծաղով նշեց, որ իր «բալզակյան տարիքն» է: Թեև Նելլին նշեց, որ այնքան երիտասարդ չէ, որ համարձակ նշի իր տարիքը, բայց այնքան ծեր էլ չէ, որ վախենա դրանից:

Ինչևէ, դերասանուհին այսօր իր օրը սկսել է աշխատանքային, ինչպես մյուս ծննդյան օրերը: «Ես կփորձեմ օրվա վերջում մի փոքրիկ տոն ունենալ բոլոր նրանց հետ ում սիրում եմ: Այս անգամ ես հրավեր չեմ անում, այլ ինձ են հրավիրում»: Յուրաքանչյուր տարի դերասանուհի Նելլիի համար անմոռանալի և օրիգինալ նվերներ են երեխաների կողմից պատրաստած թղթե բացիկները, պլաստիրինե նվերները, որովհետև դրանք սիրով են պատրաստած ու իրենց ձեռքով: «Ամեն տարի Տիգրանը միշտ շատ հետաքրքիր նվերներ է մատուցում, բայց այսօր դեռ նվեր չեմ ստացել»: Դերասանուհին բարձրաձայն շեշտեց՝ «ԴԵՌ»:

Ի դեպ այս առիթով ArmStar.am-ը ևս կարող է մի փոքրիկ գաղտնիք բաց անել՝ հույս ունենալով, որ դերասանուհի Նելլի Խերանյանը մինչև ամուսնուց նվեր ստանալը չի կարդա մեր այս նյութը: Նրա ամուսին Տիգրան Ներսեսյանի հետ զրույցի ժամանակ ArmStar.am-ը պարզեց, որ յուրաքանչյուր տարի մինչև կմոտենա կնոջ ծննդյան օրը, Տիգրանը զգուշորեն պարզում է, թե ինչի կարիք ունի կինը՝ Նելլին, թե ինչ է նա ուզում ունենալ և, այսպիսով, մատուցում է նրան այդ անակնկալը: «Այս անգամ անակնկալս, նվերս շատ մեծ է: Տեղյակ եմ եղել, թե նա ինչ է ուզում: Մեծ նվեր եմ արել տան հետ կապված, իր հարմարավետության հետ կապված: Նվերը չեմ մատուցել գիշերը, կփոխանցեմ այսօր: Նա դեռ չգիտի, թե ինչ անկանկալ է իրեն սպասվում»,-ասաց սիրված դերասան Տիգրան Ներսեսյանը:

Ինչ վերաբերվում է Նելլի Խերանյանի նախկին ծննդյան տոներին, ապա մեզ հետ զրույցում դերասանուհին պարզաբանեց, որ նախորդ տարիներին ծնողներն իր ծնունդը տոնել են մայիսի 9-ին, քանի որ այդ օրը ոչ աշխատանքային է եղել: Հետո, ավելի մեծ տարիքում, Նելլին բացահայտել է, որ ծնվել է ոչ թե մայիսի 9-ին, այլ 10-ին: «Առհասարակ երբեք ծննդյանս օրը մեծ տոնի զգացողություն չեմ ունեցել, գուցե այն պատճառով, որ ենթագիտակցորեն հասկանում եմ, որ մեծանում եմ»: Ամեն դեպքում ArmStar.am-ի հետ զրույցի ընթացքում մտաբերեցինք, որ դեռևս ոչ ոք չի բացահայտել երկարակեցության գաղտնիքն առանց ծերանալու, իսկ Նելլիի դեպքում' մեծանալու: Ամեն դեպքում մենք ևս մեկ անգամ հիշեցրինք Նելլի Խերանյանին, որ կարևորը մարդկանց հոգու երիտասարդությունն է. երբեմն տարիքը անզոր է հոգու երիտասարդության դեմ, ինչպես որ Նելլիի դեպքում է:

ArmStar.am-ը շնորհավորում է դերասանուհուն, մաղթում, որ միշտ լինի այդպես գեղեցիկ, երիտասարդ և լի եռանդով, կյանքի հանդեպ անսահման սիրով:

Զրուցեց Աշխեն Մնացականյանը / ArmStar.am /